بەيجىڭ ترامپ مالىمدەمەسىنە «الاڭدايتىنىن» ءبىلدىردى
استانا. قازاقپارات - قىتاي ا ق ش- تىڭ جاڭا سايلانعان پرەزيدەنتى دونالد ترامپتىڭ ا ق ش- تىڭ تايۋانمەن قارىم- قاتىناسىن قايتا قارايتىنى تۋرالى مالىمدەمەسىنە «الاڭدايتىنىن» ءبىلدىردى.
قىتاي سىرتقى ىستەر مينيسترلىگىنىڭ باسپا ءسوز حاتشىسى گەن شۋان 12 - جەلتوقساندا ترامپتىڭ پىكىرى ا ق ش- قىتاي قارىم- قاتىناسىنا «تەرىس اسەر ەتۋى» مۇمكىن ەكەنىن مالىمدەدى. گەن شۋان ترامپتىڭ سوزىنە قاتىستى «قىتاي مۇنى قاپەرىنە الدى جانە وعان قاتىستى الاڭداۋشىلىق بىلدىرەدى. مەن تايۋان ماسەلەسى قىتايدىڭ ەگەمەندىگى مەن تەرريتوريالىق تۇتاستىعىنا قاتىستى ەكەنىن جانە قىتايدىڭ نەگىزگى مۇددەلەرىنە ءتيىپ كەتەتىنىن بىلدىرگىم كەلەدى» دەدى.
تايۋاندى قىتايدىڭ اجىراماس بولىگى دەپ قارايتىن پەكيندەگى كوممۋنيستىك بيلىك وزگە مەملەكەتتەردىڭ ارالمەن رەسمي بايلانىس ورناتۋىنا قارسى.
ا ق ش- تا 1979 - جىلى كۇشىنە ەنگەن تايۋانمەن قارىم- قاتىناس تۋرالى زاڭعا سايكەس، ارالمەن ەكونوميكالىق بايلانىستار ورناتۋعا بولعانىمەن ديپلوماتيالىق قارىم- قاتىناستار قاراستىرىلماعان.
ءبىراق ترامپ 11 - جەلتوقساندا Fox News اگەنتتىگىنە «ۆاشينگتون ەگەر قىتايمەن باسقا ماسەلەلەردە، ونىڭ ىشىندە ساۋدا- ساتتىق بويىنشا كەلىسىم جاساسپاعان بولسا «وندا پەكينمەن «ءبىرتۇتاس قىتاي» ساياساتىن ورىنداۋعا قاتىستى جاۋاپكەرشىلىكتى سەزىنە المايتىنىن ايتقان. «مەن قىتايدىڭ ايتقانىمەن جۇرگىم كەلمەيدى» دەگەن ترامپ.
وسى ايدىڭ باسىندا تايۋان اكىمشىلىگىنىڭ باسشىسى ساي ينۆەن ترامپتى تەلەفونمەن پرەزيدەنت بولىپ سايلانۋىمەن قۇتتىقتاعان. پەكين تايۋان باسشىسىنىڭ بۇل ارەكەتىنە نارازىلىق تانىتقان.
«ازاتتىق» جاڭالىقتارى
