قىتايلىق عالىمدار: الەۋمەتتىك جەلىلەر وقيعالاردى ەستە ساقتاۋعا كومەكتەسەدى

ولار عالامتوردا بولىسكەن وقيعالار ۇزاق ەستە قالادى دەپ ەسەپتەيدى. زەرتتەۋ اۆتورى تسي ۆاننىڭ پىكىرىنشە، ءومىردىڭ ماڭىزدى ساتتەرىن عالامتورعا جاريالاۋ كەرەك. سوندا ول ەستە ۇزاعىراق ساقتالادى.

بۇل ءۇشىن Twitter, Facebook «ۆكونتاكتە» جانە وزگە دە جەلىلەر بار. زەرتتەۋگە 66 ستۋدەنت قاتىستى. ولارعا كۇندەلىك جۇرگىزىپ، بارلىق وقيعانى جازىپ وتىرۋ مىندەتتەلدى.

الەۋمەتتىك جەلىگە جاريالانعان وقيعا ماڭىنا بەلگى قويىلدى. سونداي-اق، ستۋدەنتتەر ءار وقيعانى ماڭىزدىلىعى بويىنشا 5 بالدىق شكالامەن باعالادى.

اپتا سوڭىندا زەرتتەۋشىلەر قاي وقيعانىڭ ەستە قالعانىن سۇرادى. بەلگىلى بولعانداي، ولار عالامتورعا جاريالاعان وقيعالاردى ەستە ساقتاپ قالعان. ءبىر اپتادان كەيىن دە ءدال وسى ناتيجە قايتالانعان.

ءبىراز ۋاقىت وتكەن سوڭ عالىمدار ستۋدەنتتەرگە تاعى دا كۇندەلىك جۇرگىزۋدى، تەك عالامتورعا ماڭىزى جوق وقيعالاردى جاريالاۋدى تاپسىردى. بۇل ساۋالناما قورىتىندىسى دا ءباز باياعى: الەۋمەتتىك جەلىگە جاريالانعان اقپاراتتار كوبىرەك ەستە ساقتالعان.

وسىلايشا، ادامدار الەۋمەتتىك جەلىلەرگە جاريالاعان وقيعالاردى ۇزاق ەستە ساقتايتىنى انىقتالدى، دەپ جازدى Svopi.