اتامەكەنگە ورالىپ، ورىمدەي جاستى ولىمنەن قۇتقارام دەپ ءوز ومىرىن قيعان قانداسىمىزدى قازىرگى كەزدىڭ باتىرى

جەلى پايدالانۋشىلارى ونى ناگراداعا ۇسىنۋ وتىنىشىمەن «قاراپايىم باتىر»، «قازىرگى كەزدىڭ باتىرى» حەشتەگتەرىمەن قۇماربەك جاكەتاي ۇلىنىڭ فوتوسىن سالعان. «باتىردىڭ جاتقان جەرى جارىق بولسىن!!! جاكەتاي قۇماربەك سياقتى ادامدار ءبىرىنشى بوپ ومىردەن وزاتىنى وكىنىشتى... الەمدە باتىرلار ازايۋدا. مۇنداي جاعدايدا باسىن قاتەرگە تىگىپ، كومەك كورسەتەتىندەر وتە از!!! ول ناگراداعا، ال تۋىستارى قۇرمەتكە ابدەن لايىقتى»، - دەپ جازدى فەيسبۋكتە مەرۋەرت ابايەۆا.

نادەجدا بەبەنينا ءوز كەزەگىندە ارتىندا ايەلى مەن بالالارى قالعان قۇماربەكتىڭ وتباسىنا ماتەريالدىق كومەك بەرۋدى ۇسىنادى.

«بۇل وتباسىعا تۇرعىن ءۇي، ماتەريالدىق كومەك، بالالارىن گرانتپەن وقىتۋ سياقتى كومەك كورسەتۋ قاجەت. ولار اسىراۋشىسىنان ايىرىلدى. ەندى ولارعا ءومىر وڭايعا سوقپايدى. ال ناگرادا - بۇل ونى ادامداردىڭ جۇرەگىندە ماڭگى ساقتاۋ جانە شەكسىز العىس رەتىندە بەرىلۋى ءتيىس! جاتقان جەرىڭ جايلى بولسىن!»، - دەپ جازدى ول.

ينستاگرامدا «skopetro» قوعامداستىعىندا دا قۇماربەكتىڭ ەرلىگىن تالقىلاۋدا. «جولدا اپاتتى كورگەن ول زارداپ شەككەندەردى قۇتقارۋعا ۇمتىلدى. قۇماربەك ءوز ءومىرىن قيىپ، كىشكەنتاي ءدانيلدىڭ ءومىرىن امان الىپ قالدى. مۇنداي ادامدار نەكەن-ساياق، سوندىقتان ماڭگى جادىمىزدا ساقتاۋىمىز قاجەت. قۇماربەكتىڭ ارتىندا وتباسى، ءۇش بالاسى قالدى. ولار اكەلەرىن ماقتان تۇتىپ وتەتىن بولادى»، - دەپ جازدى ولار.

قۇماربەك جاكەتاي ۇلى بۋراباي اۋدانى جاڭاجول اۋىلىنىڭ تۇرعىنى. 1991-جىلى موڭعوليادان اتامەكەنگە ورالعان. ارتىندا ءۇش بالاسى، جارى قالدى. ول ءومىرىنىڭ سوڭعى ساتىندە قارشاداي بالانى امان الىپ الۋعا كومەكتەسىپ، ورىمدەي جاس قىزدى قۇتقارىپ قالدى. ەكى جاستىڭ ءومىرى ءۇشىن ءوز جانىن پيدا ەتتى.