وزگە ۇلت وكىلى مەملەكەت باسشىسى نازاربايەۆقا «بالقاديشا» ءانىن ورىنداپ بەردى - كەسكىن

استانا. قازاقپارات - حالىقتار دوستىعىنا ارنالعان ءبىر جيىندا الەكسەي لودوچنيكوۆ وسى ءبىر ءوتىنىشىن مەملەكەت باسشىسى نۇرسۇلتان نازاربايەۆقا ايتقان بولاتىن، دەپ حابارلايدى قازاقپارات ءتىلشىسى.

«اسا قۇرمەتتى ەلباسى، مەنىڭ ەسىمىم - لودوچنيكوۆ الەكسەي. مەن تاعدىردىڭ جازۋىمەن اۋداندىق بالالار ۇيىندە تاربيەلەندىم. قازىر مۋزىكالىق كوللەدجدە وقيمىن. ايگىلى اتامىز امىرە قاشاۋبايەۆ 1925-جىلى پاريجدە وتكەن ەكسپو كورمەسىندە «بالقاديشا» ءانىن ورىنداعان. كەلەر جىلى استانا ەكسپو-دا مەن دە سول ءاندى ورىنداعىم كەلەدى»، - دەگەن بولاتىن لودوچنيكوۆ.

سول كەزدە پرەزيدەنت: «جاقسى، ورىنداساڭ، تاۋەلسىزدىكتىڭ 25 جىلدىعىنا ارنالعان كونسەرتكە شاقىرامىز»، - دەدى.

بۇگىن استانادا مەملەكەت باسشىسىنىڭ قاتىسۋىمەن وتكەن «بەيبىتشىلىك پەن كەلىسىمنىڭ 25 جىلى» اتتى مەرەكەلىك جيىندا لودوچنيكوۆ قولىنا دومبىرا الىپ، «الاۋ» توبى مەن ءانشى ديماش قۇدايبەرگەنمەن بىرگە «بالقاديشانى» ورىنداپ بەردى.