اسسامبلەيا ءتۇرلى ءدىن مەن ۇلت وكىلدەرىن جاقىنداستىردى - پرەزيدەنت
«بۇگىنگى فەستيۆالعا ەلىمىزدىڭ بارلىق وڭىرلەرىنەن ەتنومادەني بىرلەستىكتەردىڭ وكىلدەرى كەلىپ وتىر. رەسپۋبليكا بويىنشا 1332 وسىنداي بىرلەستىك جۇمىس جاسايدى. بۇل قازاقستاننىڭ ءوزىنىڭ بارلىق ازاماتتارى ءۇشىن وتان-اناسى ەكەندىگىن بىلدىرەدى. قازاقستاندىق ءبىر ءۇيدىڭ بالالارىنداي، ءبىزدىڭ وتانىمىزدىڭ كوركەيۋىنە جانىن، تاعدىرىن سالىپ جاتىر. وسى تۇرعىدا قازاقستان حالقى اسسامبلەياسىنىڭ ءرولى وتە ۇلكەن. اسسامبلەيا ءتۇرلى ءدىن مەن ۇلت وكىلدەرىن جاقىنداستىردى، ءار حالىقتىڭ داستۇرىنىدە، مادەنيەتىندە بار بارلىق جاقسىنى پاش ەتە ءبىلدى. ءبىز ءبىر-بىرىمىزگە باۋىرلاسىپ الدىق، ءوزىمىزدىڭ ورتاق ەلىمىزدە ءبىرتۇتاس حالىققا اينالدىق. ءبىر قاراعاندا، ءتۇرلى ەتنوستاردىڭ داستۇرلەرى ءبىر-بىرىنە ۇقسامايتىن سەكىلدى. ءبىراق ولاردىڭ بارلىعى ءبىر ماعىنا بەرەدى، ولاردى تۇرلىشە اتاساق تا، ۋاقىتتارى مەن سەبەپتەرى ءتۇيىسىپ جاتادى. قازاقستاننىڭ بىرلىگى جاراسقان حالقى رەتىندە ولاردىڭ بارلىعىن ءبىر كىسىدەي اتاپ ءوتىپ جاتامىز. بارلىق ەتنوستاردىڭ مەرەكەلەرىن قۋانا اتاپ وتەمىز. سەبەبى ءبىز تۇراقتىلىق پەن بىرلىكتىڭ ەرەكشە رۋحىن قالىپتاستىرا بىلدىك. سەبەبى ءبىزدى بىرىكتىرەتىن ايىرىقشا رۋx جاساي الدىق. قازاقستاندا ءومىر ءسۇرۋ، وقۋ، جۇمىس ىستەۋ بارلىق ازاماتتارىمىز ءۇشىن جايلى. بەيبىتشىلىك پەن كەلىسىم - باستى بايلىق. بۇل - تاۋەلسىزدىگىمىزدىڭ 25 جىلىندا قول جەتكىزگەن باستى بايلىعىمىز»، - دەدى مەملەكەت باسشىسى.
فەستيۆال بارىسىندا پرەزيدەنت فورۋمعا قاتىسىپ وتىرعان جاس- وسكەلەڭ بۋىنعا ۇندەۋ جولدادى.
«بۇگىنگى فەستيۆالدا وسىدان 20 جىلدان استام ۋاقىت بۇرىن قازاقستان حالقى اسسامبلەياسىن قۇرۋعا اتسالىسقان مەنىڭ قاناتتاستارىمنىڭ بالالارى قاتىسۋدا. بۇل ۇرپاق جالعاستىعىنىڭ بەلگىسى. مەن وسىندا قاتىسىپ وتىرعان جاستارعا سالەم ايتامىن. 25 جىلدا جاساعان بارلىق ىستەر سىزدەرگە ارنالدى، سىزدەر بىزدەردەن دە جاقسى ءومىر ءسۇرۋ ءۇشىن. سىزدەردىڭ بالالارىڭىز، سىزدەردەن جاقسى ءومىر ءسۇرۋ ءۇشىن. ءبىزدىڭ قىزمەتىمىزدىڭ ءمانى دە سوندا. «ماڭگىلىك ەل» جالپى ۇلتتىق يدەياسىنىڭ ماڭىندا توپتاسقان ورتاق بولاشاق ۇلت - سىزدەرسىزدەر. ءبىزدىڭ قازاقستانىمىزدىڭ كوركەيۋى جولىندا ادال ەڭبەك ەتىڭىزدەر. وتاندى سۇيىڭدەر»، - دەدى نازاربايەۆ فەستيۆالدىڭ اشىلۋ سالتاناتىندا.
اۆتور: جاسۇلان جولدىبايەۆ
