تولىعىمەن اۆتوماتتاندىرىلعان شەكارا بەكەتى قالاي جۇمىس ىستەيدى

استانا. قازاقپارات - ق ر قارجى مينيسترلىگى مەملەكەتتىك كىرىستەر كوميتەتى جاڭارتىلعان شەكارا بەكەتىنىڭ تيپتىك جوباسىن ازىرلەدى. قازاقپارات اگەنتتىگى اتالعان جوبانى سۋرەتتەيتىن بەينەباياننىڭ تولىق نۇسقاسىن ءبىرىنشى بولىپ جاريالاپ وتىر.

 كوميتەتتىڭ باسقارما باسشىسى قايرات ماۋبايەۆتىڭ ايتۋىنشا، قازىرگى شەكارا بەكەتتەرىن وزىق تەحنولوگيالارمەن جابدىقتاپ، قوسىمشا ينفراقۇرىلىم نىسىندارىن سالعاننان كەيىن تاۋارلار مەن كولىك قۇرالدارىن وتكىزۋ ۋاقىتى ەكى ەسەگە قىسقارادى. ال كولىك جۇرگىزۋشىنىڭ ءوزى ماشينادان مۇلدەم تۇسپەسە دە بولادى. وسىنىڭ ارقاسىندا جەمقورلىق ارەكەتتەرىن دە بارىنشا ازايتۋ جوسپارلانعان.

تولىعىمەن اۆتوماتتاندىرىلعان شەكارا بەكەتتەرىنىڭ جۇمىسىن استاناداعى ديسپەتچەرلىك ورتالىق باقىلايدى دەگەن جوسپار بار. جالپى، ەلىمىزدەگى 11 اۆتو، 5 تەمىرجول جانە 12 اۋە بەكەتىن جاڭارتۋ ءۇشىن شامامەن 70 ميلليارد تەڭگە قاجەت. الايدا اتالعان قارجى بيۋدجەتتەن تارتىلا ما، جوق الدە بيزنەس پەن مەملەكەت بىرلەسىپ كوتەرە مە، ول جاعى ازىرشە بەلگىسىز. كوميتەت باسشىسىنىڭ سوزىنە قاراعاندا، قارجى ماسەلەسى شەشىلگەننەن كەيىن الدىمەن ەلىمىزدىڭ شىعىس پەن وڭتۇستىگىندەگى شەكارا بەكەتتەرىن جاڭارتۋ جۇمىستارى قولعا الىنباق. سەبەبى ول جاقتان كەلەتىن تاۋار كوپ.

 اۆتور: ارمان اسقاروۆ