ماڭعىستاۋ وبلىسىندا ءابىش كەكىلبايەۆ اۋديتورياسى اشىلدى
اۋديتوريانى ءابىش كەكىلبايەۆتىڭ جۇبايى كلارا جۇماباي قىزى مەن ماڭعىستاۋ وبلىسىنىڭ اكىمى اليك ايداربايەۆ سالتاناتتى تۇردە اشىپ، لەنتاسىن قيدى. «ءابىش كەكىلبايەۆ قازاق قاۋىمىن بىرلىككە باستاپ، ەلىن ەرتەڭىنە ۇندەيتىن، وتكەن تاريحتى ساراپتاپ، جۇرتىنا ساباق كورسەتەتىن، ۇلتتىڭ ۇستامى، ۇرپاقتىڭ ۇستازىنا اينالعان تۇلعالار قاتارىنان بولدى. ءابىش اعا وراق اۋىز شەشەندىگىمەن، كورەگەن كوسەمدىگىمەن، ايرىقشا تالانتىمەن، ابىزدىق قاسيەتىمەن ەرەكشەلەنەدى. ماڭعىستاۋدا ءابىش كەكىلباي ۇلى اتىنداعى رۋحاني ورتالىق سالۋ ماسەلەسى كوتەرىلىپ، جوبالىق جۇمىستارى جاساقتالدى. ورتالىق دراما تەاترى سەكىلدى كەشەن كۇيىندە سالىنىپ، ارنايى مۇراجاي، كىتاپحانا، كونسەرتتىك زال بولاتىنىن قاراستىرعان. ماڭعىستاۋلىقتار، سونداي-اق، ءابىش كەكىلباي ۇلى ەنتسيكلوپەدياسىن شىعارۋ تۋرالى دا باستاما كوتەرىپ، ءتيىستى جۇمىستار اتقارۋدا»، - دەپ اتاپ ءوتتى ايماق باسشىسى اليك ايداربايەۆ.
ءابىش كەكىلباي ۇلى اتىنداعى وقۋ اۋديتورياسى عۇلاما دارىننىڭ عيبراتتى ءومىر جولى تۋرالى اقپاراتتاردى قامتيتىن «ءا. كەكىلباي ۇلىنىڭ ءومىر جولى»، «زامانىنىڭ زاڭعار ۇلى»، «ءا. كەكىلباي ۇلىنىڭ ادەبي مۇراسى»، «مەملەكەت جانە قوعام قايراتكەرى»، «ءابىش كەكىلباي ۇلى جانە ماڭعىستاۋ» اتتى ستەندىلەرىمەن جابدىقتالعان. سونىمەن قاتار، وقۋ اۋديتورياسىندا ۇلى سۋرەتكەردىڭ قالامىنان تۋعان حالقىنىڭ ماڭگى رۋحاني سۋسىندار مۇراسىنا اينالار ەڭبەكتەرى ارنايى كىتاپ سورەسىنە قويىلعان.
بۇل سورەگە جازۋشى مۇراسىن زەرتتەۋمەن اينالىسىپ جۇرگەن «قازاق ءتىلى مەن ادەبيەتى» كافەدراسىنىڭ پروفەسسور-وقىتۋشىلارىنىڭ دا مونوگرافيالارى مەن وقۋ قۇرالدارى ورنالاستىرىلعان. وقۋ اۋديتورياسىنىڭ اشىلۋ سالتاناتىندا ماڭعىستاۋلىقتارعا ارناپ «ءابىش الەمى» جۋرنالىنىڭ تانىستىرىلىمى ءوتتى.
