ورتالىق ازياداعى ءومىر سۇرۋگە ەڭ قولايسىز قالالار
ەڭ قىزىعى، بۇل تىزىمگە افريكا قۇرلىعىنداعى قالالاردان بولەك، ورتالىق ازيا ەلدەرىنىڭ ءتورت بىردەي استاناسى ەنىپتى.
Business Insider پورتالى تالداۋ كومپانيالارىنىڭ ۇلگىسىمەن جىل سايىن ەڭ ناشار قالالار مەن ەلدەردىڭ ءتىزىمىن جاساپ وتىرادى. بۇل تۇستا نازارعا مىنا كريتەريلەر الىنادى: ساياسي جانە الەۋمەتتىك تۇراقتىلىق، ەكونوميكا، الەۋمەتتىك- مادەني احۋال، مەديتسينا مەن دەنساۋلىق ساقتاۋ سالاسى، ءبىلىم بەرۋ جۇيەسى، كولىك، تۇرعىن ءۇي ماسەلەسى، سونداي- اق، دەمالىس ورىندارى مەن قورشاعان ورتانى قورعاۋ ماسەلەلەرى.
بيىل ءومىر ساپاسىنىڭ يندەكسى بويىنشا الەمدەگى ەڭ ءىرى كونسالتينگتىك كومپانيالارىنىڭ ءبىرى - Merker دۇنيەجۇزىنىڭ 230 ەلىنىڭ ىشىنەن 27 مەملەكەتتى ەرەكشە تالداۋعا العان. ءومىر ءسۇرۋ ءۇشىن ەڭ ناشار قالالاردىڭ 26 - ورنىندا تاشكەنت تۇر. باسىلىمنىڭ جازۋىنشا، «سوڭعى جىلى بۇل ورتالىق ازيالىق قالا تەرروريزمنىڭ ۇياشىعىنا اينالدى. 2015 -جىلى تاشكەنتتە سوڭعى 11 جىل ىشىندە ا ق ش- تىڭ ەلشىلىگىنە ءبىرىنشى رەت شابۋىل جاسالدى. ال ۇكىمەت ءالى دە كۇشەيىپ بارا جاتقان ەكسترەميزممەن كۇرەسىپ كەلەدى». 23 - ورىندا - تۇركمەنستان استاناسى اشحاباد. باسىلىمعا سەنسەك، بۇل قالانى ۇكىمەت قاتتى قاداعالايدى. «جۇمىس ورىندارىنىڭ باسىم بولىگى مەملەكەتتىك كاسىپورىندارعا كەلەدى. وكىنىشكە قاراي، ناشار مەملەكەتتىك مەنەدجمەنتتىڭ كەسىرىنەن ەل استاناسى سۋ تاپشىلىعىن سەزىنۋدە، بۇل قالا تۇرعىندارىنا كوپ قولايسىزدىق تۋعىزادى، سەبەبى مۇنداعى اۋا تەمپەراتۋراسى 2015 -جىلداعىداي سەلسيي باعامى بويىنشا 47,2 گرادۋسقا دەيىن جەتۋى مۇمكىن» - دەپ حابارلايدى Business Insider.
21 - ورىندا - بىشكەك. قىرعىزستان استاناسىن بيزنەس پورتال بىلاي سۋرەتتەگەن: «ەلدىڭ ەكونوميكالىق ورتالىعىنىڭ وزىندە كەدەيشىلىك دەڭگەيى وتە جوعارى. ال ەل ۇكىمەتى «يسلام مەملەكەتى» (يگيل) ۇيىمىنىڭ وكىلدەرىمەن كۇرەس جۇرگىزىپ جاتىر».
رەيتينگتە 19- ورىنعا جايعاسقان دۋشانبەنى شەتەلدىك باسىلىم «كەدەيلىك جايلاعان، ەنەرگورەسۋرستارعا مۇقتاج قالا» دەپ تانىعان. ءتىپتى، باسىلىمنىڭ حابارلاۋىنشا، بۇل تۇيتكىلدەر بۇكىل ەل ءۇشىن ۇلكەن ماسەلە بوپ تۇر.
رەيتينگتىڭ الدىڭعى بەستىگىندە سۋدان، گايتي، يەمەن مەن ورتالىق افريكا رەسپۋبليكاسىنىڭ قالالارى تۇرسا، ءبىرىنشى ورىنعا يراك استاناسى - باعداد ورنالاسقان.
«ايقىن» گازەتى
