بەردىبەك ساپاربايەۆ پارا الىپ ابدەن دانىككەن ديرەكتورلاردى جەرگە قاراتتى

استانا. قازاقپارات - اقتوبە وبلىسىنىڭ اكىمى بەردىبەك ساپاربايەۆ وبلىستىق پروكۋراتۋرادا وتكەن جيىن بارىسىندا ءبىلىم باسقارماسىنىڭ جۇمىسىن سىنعا الدى.

بۇل تۋرالى kerek-info.kz حابارلايدى.

«شىنىن ايتاتىن بولساق، شارشاتتى. ۇنەمى ەسكەرتۋلەر. اسىرەسە، بۇل ءبىلىم باسقارماسىنا قاتىستى ايتىلادى. بۇل ءبىلىم ەمەس قوي! اينالاسىنا ۇلگى بولۋدىڭ ورنىنا مۇعالىمدەردىڭ وزدەرى پارا الادى. ولار بولاشاق ۇرپاققا قانداي ۇلگى كورسەتەدى؟! ديرەكتورلار پارا العاندىقتان مۇعالىمدەر دە الادى. باسقارما قىزمەتكەرلەرى پارا العاندىقتان، ديرەكتورلار دا الادى. ءبىلىم سالاسىن باقىلايتىن ورگان ءۇنسىز وتىرادى. قالعاندارىنا دا سۇراقتار كوپ»، - دەگەن بەردىبەك ساپاربايەۆ جيىندا وتىرعان ديرەكتورلار مەن باسقارما باسشىلارىن جەرگە قاراتتى.

سونداي-اق، جيىن بارىسىندا ءوڭىر باسشىسى بەردىبەك ساپاربايەۆ پارا بەرگەن شەنەۋنىك جايلى دا پىكىر ءبىلدىردى.

«زاڭ بويىنشا پارا العان اداممەن بىرگە پارا بەرگەن ادام دا جاۋاپكەرشىلىككە تارتىلادى. ونىڭ ۇستىنە، ول مەملەكەتتىك قىزمەتكەر. «پارا بەردىم» دەپ بۇكىل ەلگە ماسقارا بولدى. ەگەر بالاڭنىڭ ويلاۋ قابىلەتى تومەن بولسا، وندا ارينە، پارا بەرەسىڭ. ونىڭ ءىسىن تارتىپتىك كوميسسيادا قاراۋ كەرەك. سودان كەيىن ءتيىستى قۇزىرلى ورگاندار مۇنىمەن اينالىسسىن»، - دەدى ءوڭىر باسشىسى.

ەسكە سالا كەتەيىك، باسپا سوزدە جاريالانعان ماتەريالدارعا سايكەس، دەنساۋلىق ساقتاۋ باسقارماسى باسشىسىنىڭ ورىنباسارى المات ەرماعانبەتوۆ 39 جاستاعى بوتاگوز بيەكەنوۆاعا الدانىپ قالىپتى. ول ءبىر قىزىن نازاربايەۆ ۋنيۆەرسيتەتىنە، ال ەكىنشى قىزىن نازاربايەۆ مەكتەبىنە جۇمىسقا ورنالاستىرۋ ءۇشىن بوتاگوز بيەكەنوۆاعا 20 مىڭ دوللار بەرگەن. ءبىراق ايەل ءوز موينىنا العان مىندەتىن ورىنداماي قويعان. سوسىن شەنەۋنىك قۇزىرلى ورگانعا شاعىمدانعان.

ال، رەسمي دەرەككوز تارتىپتىك كەڭەستىڭ وتىرىسىنان كەيىن باسقارما باسشىنىڭ ورىنباسارى قىزمەتىنەن بوساتىلعانىن حابارلادى.