وڭتۇستىك قازاقستاندا يران ەتنوسىنىڭ ءتىلى، مادەنيەتى جانە سالت- ءداستۇرى كۇنى اتالىپ ءوتتى
شىمكەنت. قازاقپارات - بۇگىن وڭتۇستىكتە قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا يران ەتنوسىنىڭ ءتىلى، مادەنيەتى جانە سالت- ءداستۇرى كۇنى اتالىپ ءوتتى.
وبلىستىق «قوعامدىق كەلىسىم» ك م م- دا وتكەن ءىس- شارادا ۇلتتىق تاعامدار جانە قولونەر بۇيىمدارىنىڭ كورمەسى كوپشىلىكتىڭ نازارىنا ۇسىنىلدى. وبلىستىق اسسامبلەيا حاتشىلىعىنىڭ ينسپەكتورى ۇلجان ايتۋبايەۆا بارشا قاتىسۋشىلاردى مەرەكەلەرىمەن قۇتتىقتاپ، قوعامدىق كەلىسىم مەن تۇراقتىلىق - ءبىزدىڭ باستى ۇستانىمىمىز بولۋى ءتيىس ەكەندىگىن ايتىپ ءوتتى.
ءوز كەزەگىندە وبلىستىق يران ەتنومادەني بىرلەستىگىنىڭ ءتوراعاسى نۇرىسبەك كاپار- پۋر قازاقستاندا ءاربىر ەتنوستىڭ ءوز ءتىلى مەن مادەنيەتىن ساقتاۋىنا جانە دامىتۋىنا بارلىق جاعداي جاسالعانىنا ريزاشىلىعىن ءبىلدىردى. سالتاناتتى جيىن سوڭى كونسەرتتىك باعدارلاماعا ۇلاسىپ، ەلدىڭ ىنتىماعى مەن بىرلىگىن نىعايتۋعا ۇلەس قوسىپ جۇرگەن ازاماتتار العىس حاتتارمەن ماراپاتتالدى.
ايتا كەتەرلىگى، بۇگىندە وڭتۇستىك قازاقستاندا 5 مىڭعا جۋىق يران ەتنوسىنىڭ وكىلى تۇرادى. وبلىستا 1997 -جىلى اشىلعان يران ەتنومادەني بىرلەستىگى ەل بىرلىگىن بەكەمدەۋ، قوعامدىق كەلىسىمدى ساقتاۋ باعىتىندا وڭىردە اتقارىلعان بارلىق كەشەندى ءىس- شارالاردىڭ جانىنان تابىلىپ كەلەدى. تاعى ءبىر توقتالا كەتەتىن جايت، ءبىزدىڭ ەلىمىزدە تۇرىپ جاتقان بارلىق ەتنوستىڭ كەڭ تىنىستاۋىنا، وزدەرىن ەركىن ۇستاپ، سالتتارىن ساقتاپ، داستۇرلەرىن دارىپتەۋلەرىنە، انا تىلدەرىن ۇمىتپاي، ۇلتتىق قۇندىلىقتارىن ۇلىقتاۋلارىنا تولىق مۇمكىندىكتەر جاسالىپ وتىر.
