توقتار سەرىكوۆ: شەتەلدىك انشىلەر مەيرامبەگىم مەن ساياتىمنان ارتىق ەمەس

بۇل تۋرالى 31 - ارنانىڭ «ايتا بەرسىن» باعدارلاماسىندا ايتىلدى.

ەكى ديزاينەرگە عانا ساحنالىق كيىمدەرىن سەنىپ تاپسىراتىن بەيبىت سەيدۋاليەۆا سوڭعى كۇندەرى وسى ديزاينەرلەرگە بارۋىن جيىلەتكەن. سەبەبى، جەلتوقسان ايىندا وتەتىن ەسەپ بەرۋ كەشىنە جۇلدىزدى جۇپ ەرەكشە ازىرلىكتى باستاپ كەتكەن. ايتۋلارىنشا، اتالعان كونتسەرتتە بارلىعى جاڭا بولۋى ءتيىس.

«مۇندا تەك جاۋا اندەر مەن جاڭا دۋەتتەر بولادى. بەيبىت ەكەۋىمىزدىڭ جەكە اندەرىمىز دە ورىندالادى. ونىڭ ۇستىنە بىتىراپ كەتكەن شاكىرتتەرىم بار بولاتىن. ولاردىڭ دا باسىن قوسىپ، قۇداي قالاسا، جەلتوقساننىڭ 18- كۇنى كونسەرت وتكىزبەكشىمىز. ول كەشتە بالا كۇنىمنەن بىرگە وسكەن دوستارىم ءارى ارىپتەستەرىم مەيرامبەك، سايات، دوسىمجان ونەر كورسەتەدى. شامامىز جەتكەنشە، وسىعان دەيىن وتكىزگەن كونسەرتتەرىمىزدىڭ دەڭگەيىمەن تەڭەستىرۋگە تىرىسامىز. سوڭعى كەزدە حالىق «قايدا جۇرسىڭدەر؟ نەگە كونسەرت بەرمەي كەتتىڭدەر؟ » دەپ سۇراپ جاتىر. قولدىڭ قىسقاندىعىنان، ۋاقىتتىڭ جوقتىعىنان نەمەسە قارىننىڭ توقتىعىنان كونسەرت بەرمەي جۇرگەن جوقپىز»، - دەيدى توقتار سەرىكوۆ.

بەيبىت پەن توقتاردىڭ دۋەتىنە بيىل 15 جىل تولعان. ولار حالىققا دەگەن ىستىق ىقىلاستارىن كورسەتۋ ماقساتىندا ءبىر ەمەس، ءتورت مارتە شىعارماشىلىق كونسەرت وتكىزبەك. ونىڭ ەكەۋى الماتى قالاسىندا، سوڭعى ەكى كونسەرت استانا قالاسىندا وتكىزىلمەك. الايدا وزگە ارىپتەستەرى سەكىلدى قوس ءانشى كەلگەن كورەرمەندەردى شەتەلدىك انشىلەرمەن ەمەس، ءوز ونەرلەرىمەن قۋانتپاق نيەتتە.

«ساحنا - وتە قىمبات دۇنيە. كەز كەلگەن ادام ەركىن شىعىپ ونەر كورسەتە بەرمەيتىنىن انشىلەر جاقسى بىلەدى. 3D ءبىزدىڭ كونسەرتىمىزدە دە بولادى. ساحنامىز باستان- اياق ەكى مارتە بەزەندىرەلەدى. بۇل بىرەۋلەردەن كەم بولىپ قالمايىن نەمەسە اسىپ تۇسەيىن دەگەن ماقساتتا جاسالىپ جاتقان جوق. بارلىعى اندەرىمىزدىڭ تابيعاتى مەن مىنەز- قۇلقىنا ساي جاسالىپ جاتىر.

شەتەلدەن ءانشى شاقىرتقان جوقپىن. مۇنى قالامايمىن دا. كەلىپ جاتقان شەتەلدىك ارتيستەر مەنىڭ مەيرامبەگىم مەن ساياتىمنان ارتىق ەمەس. ناعىز قازاقتىڭ مىقتىلارى سولار. قازاق سولاردى جاقسى كورەدى. سول ءۇشىن كونسەرتىمە وسى دوستارىمدى شاقىرىپ جاتىرمىن. ايتپەسە، شەتەلدەن ءانشى شاقىرۋ ءبىزدىڭ دە قولىمىزدان كەلەدى. قازىر قۋ دۇنيە نە ىستەتپەيدى. اقشا بولسا، بارلىعىن دا جاساۋعا بولادى»، - دەيدى توقتار سەرىكوۆ. كونسەرت ازىرلەۋىنە ەركىن كىرىسكەن ەكەۋ شارانىڭ شارۋاسىمەن جۇگىرىپ ءجۇر. دەگەنمەن ، ءۇش ۇلدىڭ اكەسى بالالارىنىڭ ءتاتتى قىلىعىنا تويماي جۇرگەن سەكىلدى. ۇيدەن ۇزاپ شىقسا، جىلدام ساعىناتىن ادەت تاپقان.