تۇركيا پارلامەنتى رەسەيمەن گاز قۇبىرىن سالۋ كەلىسىمىن ماقۇلدادى
استانا. قازاقپارات - تۇركيا پارلامەنتى رەسەيمەن «تۇرىك اعىنى» گاز قۇبىرى جونىندەگى كەلىسىمدى زاڭداستىردى. كەلىسىم ەندى پرەزيدەنت رەجەپ ەردوعان قول قويعان سوڭ كۇشىنە ەنەدى.
گاز قۇبىرى ەكى تارماقتان تۇرادى: ونىڭ ءبىرى گازدى تۇركيانىڭ وزىنە تىكەلەي جەتكىزەدى، ەكىنشىسى ەۋروپاعا تاسىمالدايدى. انكارا گاز قۇبىرىن سالۋعا 2017 - جىلدىڭ باسىندا كىرىسۋدى جوسپارلاپ وتىر. قۇبىر قۇرىلىسى 2019 - جىلدىڭ سوڭىندا اياقتالادى دەپ جوسپارلانعان.
10 - قازاندا رەسەي مەن تۇركيا «تۇرىك اعىنى» قۇبىرىن سالۋ جونىندە ۇكىمەت ارالىق كەلىسىمگە قول قويعان. جوبا تۇرىك اسكەريلەرى 2015 - جىلى قاراشادا سيريامەن شەكاراداعى اۋە كەڭىستىگىندە رەسەيدىڭ اسكەري ۇشاعىن اتىپ تۇسىرگەنگە دەيىن دايىندالعان. ماسكەۋ بۇل وقيعادان سوڭ انكاراعا قارسى سانكسيالار سالعان سوڭ «تۇرىك اعىنىنا» قاتىستى كەلىسسوز توقتاپ قالعان. كەلىسسوز تۇركيا رەسەي جاعىنان ۇشاقتى اتىپ تۇسىرگەنىنە كەشىرىم سۇراعان سوڭ قايتا جالعاستى.
«ازاتتىق»
