وزبەكستاندا پرەزيدەنت سايلاۋى ءوتىپ جاتىر

 سايلاۋعا ءتورت ۇمىتكەر قاتىسۋدا - پرەزيدەنت مىندەتىن اتقارۋشى شاۆكات ميرزيەيەۆ وزبەكستاننىڭ ليبەرالدىق- دەموكراتيالىق پارتياسى اتىنان تۇسۋدە، حاتامجون كەتمونوۆ حالىق - دەموكراتيالىق پارتياسىنان، ناريمان وماروۆ سوتسيال- دەموكراتتاردان جانە سارۆار وتامۋراتوۆ دەموكراتيالىق پارتيادان سايلاۋعا قاتىسۋدا.

جاڭا مەملەكەت باسشىسى بەس جىلدىق مەرزىمگە سايلانادى. سايلاۋشىلار تىزىمىنە 20 ميلليوننان استام ادام الىنعان. قازىرگى ۋاقىتتا 14 وكرۋگتىك سايلاۋ كوميسسياسى ۇيىمداستىرىلىپ،  9381 سايلاۋ ۋچاسكەسى جاساقتالدى. سايلاۋدا جەڭىسكە جەتۋ ءۇشىن ۇمىتكەر 50 پايىزدان استام داۋىس جيناۋى كەرەك. سايلاۋشىلاردىڭ قاتىسۋىنىڭ تومەنگى شەگى 33 پايىز. ەلدە ستۋدەنتتەر 1-5 - جەلتوقسان ارالىعىندا سايلاۋعا بايلانىستى كانيكۋلعا جىبەرىلدى. تاشكەنت اكىمشىلىگى سايلاۋ كۇنى استانادا قوعامدىق كولىكتە ءجۇرۋدى تەگىن ەتتى. اۆتوبۋس باعدارلارى مەن مەتروپوليتەن جۇمىسىن سايلاۋ ۋچاسكەلەرى اشىلعانعا دەيىن ءبىر ساعات بۇرىن 05.00-دە باستايدى. باستاپقى ناتيجەنى ورتالىق سايلاۋ كوميسسياسى 5 - جەلتوقساندا جاريا ەتەدى.