بايقوڭىردان ۇشىرىلعان عارىش كەمەسى تىۆا رەسپۋبليكاسىنىڭ اۋماعىنا قۇلادى
استانا. قازاقپارات - «بايقوڭىردان» ۇشىرىلعان «پروگرەسس- م س-04» عارىش كەمەسى 6 مينۋتتان كەيىن بايلانىستان جوعالىپ، حالىقارالىق عارىش ستانسىسىنا جەتپەدى، دەپ حابارلايدى قازاقپارات «روس كوسموستىڭ» رەسمي سايتىندا جاريالانعان مالىمەتكە سىلتەمە جاساپ.
«روس كوسموستىڭ» حابارلاۋىنشا، كەمە عارىش وربيتاسىنا جەتپەي رەسەي- موڭعوليا شەكاراسىنا قۇلادى. «382- سەكۋندقا دەيىن زىمىران- تاسىمالداعىشتىڭ ۇشىرىلىمى شتاتتىق رەجىمدە ءوتتى. ۇشىرىلىمنىڭ 382- سەكۋندىنان كەيىن تەلەمەتريالىق اقپاراتتى قابىلداۋ ءۇزىلدى. شتاتتىق باقىلاۋ قۇرالدارى كەمەنىڭ وربيتادا قىزمەتكە كىرىسكەنىن تىركەمەدى»، - دەلىنگەن تاراتىلعان مالىمەتتە.
«الدىن الا اقپاراتقا سايكەس، شتاتتان تىس جاعدايعا بايلانىستى كولىكتىك- جۇك كەمەسىنىڭ جوعالۋى شامامەن 190 شاقىرىم بيىكتىكتە تىۆا رەسپۋبليكاسىنىڭ ادام جۇرمەيتىن تاۋلى تەرريتورياسىندا ورىن الدى. جانە ونىڭ بولشەكتەرىنىڭ دەنى اتموسفەرانىڭ تىعىز قاباتتارىندا جانىپ كەتتى. مەملەكەتتىك كوميسسيا قالىپتاسقان شتاتتان تىس جاعدايعا تالداۋ جۇرگىزۋدە»، - دەپ حابارلادى رەسەيدىڭ عارىش اگەنتتىگى.
كورپوراتسيادان اتاپ وتكەندەي، جۇك كەمەسىنىڭ جوعالىپ كەتۋى حالىقارالىق عارىش ستانسىسىنىڭ قالىپتى قىزمەتىنە جانە ستانسىداعى ەكيپاجدىڭ ومىرىنە كەرى اسەرىن تيگىزبەيدى.
