بۇگىندە بيزنەستى اشۋعا جاسالعان قولايلى جاعدايدى پايدالانۋ كەرەك - ق ر پرەزيدەنتى

استانا. قازاقپارات - قازىرگى كەزدە بيزنەستى اشۋعا قولايلى جاعداي جاسالىپ وتىر. بۇگىن تاۋەلسىزدىك سارايىندا رەسپۋبليكالىق جاستار فورۋمىندا مەملەكەت باسشىسى نۇرسۇلتان نازاربايەۆ وسىلاي ءمالىم ەتتى، دەپ حابارلايدى قازاقپارات.

«قازىرگى كەزدە قازاقستاندا بيزنەستى اشىپ، دامىتۋ ءۇشىن ەڭ قولايلى جاعداي جاسالىپ تۇرعان كەزەڭدەمىز. يندۋستريالدى باعدارلامانى جۇزەگە اسىرۋ اياسىندا جاڭا جوبالار اشىلۋدا، وسى ورايدا 6 سى كۇنى ونىڭ قورىتىندىسىن جاسايمىز. ءبىرىنشى بەسجىلدىقتا مىڭنان استام كاسىپورىن اشىلدى. كەلەسى بەسجىلدىقتا تاعى دا 300-400 كاسىپورىن ىسكە قوسىلادى. وسى قازىرگى زامانعى قۋاتتى كاسىپورىندار اينالاسىندا بۇل كومپانيالاردى سەرۆيسپەن قامتاماسىز ەتۋى ءتيىس شاعىن كاسىپورىندار قۇرىلۋدا. سونىمەن قاتار جەكەشەلەندىرۋ ءجۇرىپ جاتىر، ياعني بۇل جەكەشەلەندىرۋدىڭ مۇمكىندىگىن پايدالانىپ، جۇمىستى باستاۋ كەرەك. كومپانيالاردىڭ اكتيۆتەرىن باسەكەلەستىك ورتاعا بەرۋ جوسپارى تۇرعىسىنداعى جۇمىستارمەن بارشا اۋدانداردىڭ اكىمدەرى اينالىسىپ، وسى ۇدەرىستىڭ قاتىسۋشىسى بولۋعا جاستارعا كومەكتەسۋى ءتيىس»، - دەپ توقتالدى مەملەكەت باسشىسى.

وسى ورايدا پرەزيدەنت ەل تۇرعىندارىن ءتۇرلى باعدارلامالار اياسىندا جەكە ىسكەرلىكتى اشۋ بويىنشا ۇسىنىلىپ وتىرعان مۇمكىندىكتەردى بەلسەندى پايدالانۋعا شاقىردى.

اۆتور: رۋسلان عابباسوۆ