جاس ۇرپاقتىڭ قۋاتى - تاۋەلسىز قازاقستاننىڭ قۋاتى - نازاربايەۆ

استانا. قازاقپارات - جاس ۇرپاقتىڭ قۋاتى - بۇل تاۋەلسىز قازاقستاننىڭ قۋاتى. بۇل تۋرالى بۇگىن رەسپۋبليكالىق جاستارى فورۋمىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.

«بۇل باس قوسۋعا ەلىمىزدىڭ ءار تۇكپىرىنەن نەشە ءتۇرلى ماماندىقتىڭ جاستارى جينالىپ وتىر. تاۋەلسىزدىك سارايى بۇگىن جاس قۋاتقا تولى. ءبارىمىزدىڭ قۋانىشىمىز شەكسىز. جاس ۇرپاقتىڭ قۋاتى - بۇل تاۋەلسىز قازاقستاننىڭ قۋاتى، بولاشاعى دەپ سانايمىن. قاتار كەلەتىن قوس مەيرام، بۇگىنگى تۇڭعىش پرەزيدەنت كۇنى قازاق قازاق بولعالى، ءبىز ەل بولعالى ءوز بەتىمىزبەن تۇڭعىش ەلباسىمىزدى بۇكىل حالىق بولىپ دەربەس سايلاپ العان ەلدىڭ قۋانىشتى كۇنى. ەكىنشى قۋانىش، ول، ارينە، الدىمىزدا كەلە جاتقان تاۋەلسىزدىگىمىزدىڭ 25 جىلدىعى، اتا-بابامىزدىڭ شەكسىز ارمانى ورىندالعانى. ەلىمىز قيىنشىلىقتىڭ ءبارىن كوتەرىپ، وسى زامانعا جەتتى. قازاقستاندى دۇنيەجۇزىنىڭ كارتاسىنا نىق قويعانىمىز، دارەجەسىن كوتەرگەنىمىز، ەلىمىزدىڭ مەرەيى ۇستەم بولعانى بارشالارىڭىزدىڭ، بارشامىزدىڭ ىستەگەن ەرەن ەڭبەگىمىزدىڭ ارقاسى سانالادى»، - دەدى نازاربايەۆ.

مەملەكەت باسشىسى بۇگىنگى جاستار قازىرگى احۋالدى، توڭىرەگىمىزدەگى جاعدايدى باعالاي ءبىلۋى كەرەكتىگىن اتاپ ءوتتى.

«بۇرىن كەڭەس وداعىنىڭ ءبىر بولشەگى ەدىك. سول بولشەكتەن ەل جاساۋ، جۇرت جاساۋ، ونىڭ بارلىق كەرەكتى رامىزدەرىن بەكىتۋ، دۇنيەجۇزىنە پاش ەتۋ وڭاي بولعان جوق. اشتىقتىڭ دا، جالاڭاشتىقتىڭ دا، جۇمىسسىزدىقتىڭ دا بارىنەن وتتىك. بۇگىن ءال-اۋقاتى ورتا دەڭگەيدەن جوعارى مەملەكەتتەردىڭ ىشىنە كىردىك. وعان ءتاۋبا دەيمىز. بارلىعىمىزدىڭ ەڭبەگىمىزدىڭ ارقاسى»، - دەدى ەلباسى.

اۆتور: مارلان جيەمباي