گرۋزيا دەموگرافيالىق داعدارىستىڭ الدىندا تۇر

ارنايى زەرتتەۋ جۇرگىزگەن ب ۇ ۇ وكىلدەرى وسىنداي قورىتىندىعا كەلدى، دەپ جازادى «حابار 24».

الدىن الا بولجام بويىنشا گرۋزيا حالقى 2050-جىلعا قاراي ءبىر ميلليون ادامعا، ياعني 28 پايىزعا ازايۋى مۇمكىن. سوڭعى 4 جىلدىڭ ىشىندە ەلدەگى بالا تۋۋ دەڭگەيى كۇرت تومەندەۋى مۇمكىن. «2020-جىلدان باستاپ گرۋزيادا بالا تۋۋ دەڭگەيى 2 ەسە قىسقارادى. 1980 جانە 1990-جىلدار ارالىعىندا شامامەن 500 مىڭ، ال 1990 جانە 2000-جىلدار ارالىعىندا 245 مىڭ بالا تۋعان. سوندا 2020-جىلدان باستاپ تۋاتىن انالار قاتارى 2 ەسە ازايدى دەگەن ءسوز»، - دەيدى دەموكراتيالىق جاڭارۋ قورىنىڭ باسشىسى تامار چيبۋردانيدزە.

90-جىلداردىڭ باسىنداعى بالا تۋۋدىڭ كەمۋىنە ابحازياداعى قارۋلى قاقتىعىس پەن تاۋەلسىزدىك العاننان كەيىنگى ەكونوميكالىق-الەۋمەتتىك قيىندىقتار سەبەپ بولعان. ساراپشىلار دەموگرافيالىق داعدارىستىڭ الدىن الۋ ءۇشىن قازىردەن باستاپ شارالار قابىلداۋ قاجەت دەپ ەسەپتەيدى. وتباسى ينستيتۋتىن قولداۋعا قوعامدىق بەلسەندىلەر ۇلەس قوسىپ جاتىر. جەرگىلىكتى جاس فوتوگرافتار «قىز بالا دۇنيەگە كەلدى» دەگەن اتاۋمەن ارنايى كورمە ۇيىمداستىردى.

وسىلايشا ولار تۇسىك جاساتۋعا قارسىلىق بىلدىرگەن. سەبەبى گرۋزين وتباسىندا ۇلدارعا ارتىقشىلىق بەرەدى ەكەن. زەرتتەۋ ناتيجەسى كورسەتكەندەي، بۇل ەلدە ءجۇز قىز بالاعا 110 ۇلدان كەلەدى. «ءبىزدىڭ قور گرۋزيا ۇكىمەتىمەن بىرلەسىپ، دەموگرافيالىق احاۋالدى قولداۋ بويىنشا 11 باستاما ازىرلەدى. ولاردىڭ اراسىندا جالعىزباستى اتا-اناعا الەۋمەتتىك دەمەۋ كورسەتۋ، تۇسىك جاساتۋدى تۇبىرىمەن جويۋ جۇمىستارى بار. بۇل شارالار ەپتەپ اسەر ەتىپ كەلەدى. ءبىراق ءالى قىرۋار شارۋا جاسالۋى كەرەك»، - دەيدى دەموكراتيالىق جاڭارۋ قورىنىڭ باسشىسى تامار چيبۋردانيدزە.

گرۋزيادا وتباسىن قۇرۋ بويىنشا العاشقى جانە ازىرگە بىردەن-ءبىر ورتالىق جۇمىس ىستەيدى. وسى مەكەمە جۇمىس ىستەگەن 17 جىلدىڭ ىشىندە جۇزدەگەن باقىتتى وتباسى قۇرىلعان. ەلدە ءقازىر بالا تۋۋ دەڭگەيى بويىنشا تبيليسي الدا تۇر.

وكىنىشكە قاراي، ەلدىڭ كەيبىر ايماقتارىنداعى دەموگرافيالىق احۋال تىپتەن ناشارلاپ كەتكەن. وسىعان بايلانىستى 2016-جىلدىڭ جازىنان باستاپ تاۋلى وڭىردە تۇراتىن كوپبالالى وتباسىلار ءۇشىن ارنايى اقشالاي كومەك بەكىتىلدى.