ريو وليمپياداسىنداعى قولا مەدالىمدى ءالى العان جوقپىن - زىلتەمىرشى ۇلانوۆ

استانا. قازاقپارات - ريو وليمپياداسىندا ءتورتىنشى ورىندى الىپ، ارتىنان قارسىلاسى دوپينگپەن ۇستالعانننان كەيىن قولا مەدال يەگەرى اتانعان دەنيس ۇلانوۆ وزىنە تيەسىلى مەدالدى ءالى الماپتى.

قازاقپارات تىلشىسىنە سۇحبات بەرگەن زىلتەمىرشى الەكسەن نيدىڭ كەتۋىنە قاتىستى ءوز ويىن ءبىلدىردى. «ەندى، قازىر رۋمىن (گابريەل سينكرايان - اۆت. ) سوتتاسىپ جاتىر. سوندىقتان ءوز مەدالىمدى ءالى العان جوقپىن.

ال الەكسەي نيدىڭ كەتۋى جايىندا ايتار بولساق، سۆەتلانا پودوبەدوۆا، مايا مانەزالار دوپينگپەن ۇستالعاننان كەيىن ول دا ءبىر ازاماتتىعىن تانىتىپ، ءوز ەركىمەن كەتۋگە شەشىم قابىلدادى دەپ ويلايمىن. مەنىڭشە، قازىر اعا بۋىن وكىلدەرىنىڭ ورنىنا جاستار كوپتەپ كەلە باستادى. سوعان ساي ماماندار بار دەگەن ويدامىن. ءبىزدىڭ اۋىر اتلەتيكامىز ونسىز قاتتى قينالىپ قالادى دەپ ويلامايمىن. سول ورىنعا لايىقتى جاس ءارى دارىندى باپكەرلەر كوپ»، - دەدى د. ۇلانوۆ.

ال ريو وليمپياداسىنىڭ كۇمىس جۇلدەگەرى جازيرا جاپپارقۇل قازاقستاننىڭ ۇلتتىق قۇراماسىن 20 جىلدان استام ۋاقىت باسقارعان باپكەردىڭ كەتكەنىن قالامايدى. ايتا كەتەيىك، ق ر م س م دەنەشىنىقتىرۋ جانە سپورت ىستەرى جونىندەگى كوميتەتتىڭ ءتوراعاسى ەلسيار قاناعاتوۆتىڭ ايتۋىنشا، جەلتوقساننىڭ 5 -كۇنى اۋىر اتلەتيكادان قازاقستان قۇراماسىنىڭ باس باپكەرى تاعايىندالادى.