تاۋەلسىزدىك كۇنىندە قازاقستان تۋى انتاركتيدانىڭ ەڭ بيىك نۇكتەسىندە جەلبىرەيدى

استانا. قازاقپارات - تاۋەلسىزدىك كۇنىندە قازاقستان تۋى وڭتۇستىك پوليۋستەگى ۆينسون شىڭىندا جەلبىرەيدى. بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە «قازاق گەوگرافيالىق قوعامى» ق ب ءتورالقاسىنىڭ ءتوراعاسى تولەگەن تاستانبەكوۆ ءمالىم ەتتى،

دەپ حابارلايدى قازاقپارات.

 «قازاق گەوگرافيالىق قوعامى» ەل تاۋەلسىزدىگىنىڭ 25 جىلدىعىنا ارناپ وڭتۇستىك پوليۋسكە ەكىنشى قازاقستاندىق ەكسپەديتسيانى ۇيىمداستىرادى. جەلتوقساننىڭ باسىندا وتەتىن بۇل ەكسپەديسياسىنىڭ قۇرامىنا جاس عالىمدار مەن سپورتشىلار كىرىپ وتىر»، - دەدى ول.

 ال قازاقستان رەسپۋبليكاسىنىڭ 25 جىلدىعىنا ارنالعان «تاۋەلسىزدىك پوليۋسى» عىلىمي- زەرتتەۋ ەكسپەديتسياسىنىڭ توپ جەتەكشىسى ماعجان ساعىمبايەۆ ەكسپەديسيانىڭ قاشان باستالاتىندىعىن ايتىپ بەردى. «باستالۋى 1 - جەلتوقساندا - قازاقستان رەسپۋبليكاسىنىڭ تۇڭعىش پرەزيدەنتى كۇنى وتەدى. ال 16 - جەلتوقساندا، ياعني، ەلىمىزدىڭ تاۋەلسىزدىك كۇنىندە انتاركتيدانىڭ ەڭ جوعارى نۇكتەسى ۆينسون شىڭىنا قازاقستاننىڭ مەملەكەتتىك تۋى تىگىلەدى»، - دەدى ساعىمبايەۆ.

 ونىڭ اتاپ وتۋىنشە، ۆينسون شىڭى وڭتۇستىك پوليۋستەن 1200 شاقىرىم جەردە ورنالاسقان جانە «7 summits»  باعدارلاماسىنا كىرەدى. ەكسپەديتسيا قاتىسۋشىلارى وڭتۇستىك پوليۋسكە دەيىن 200 شاقىرىم جەردى شاڭعىمەن ءجۇرىپ وتەتىن بولادى.

 ايتا كەتەرلىگى، ەكسپەديتسيا قۇرامىنا الپينيستەر ءىلياس عالىمبەكوۆ پەن يۋري يۋشين، عالىمدار ءاليا ەرنازاروۆا، ارمان بايمۇحامبەدوۆ جانە داۋلەت ءشارىپوۆ كىرىپ وتىر. عالىمدار وڭتۇستىك پوليۋستە ەكولوگيا، بيولوگيا جانە ادام فيزيولوگياسى سالالارىندا زەرتتەۋ جۇمىستارىن جۇرگىزەدى.

 اۆتور: مارلان جيەمباي