نازاربايەۆ سىيعا تارتقان جىلقى فينليانديالىقتاردىڭ اتقا مىنۋگە دەگەن قىزىعۋشىلىعىن تۋدىرعان

استانا. قازاقپارات - فينليانديا پارلامەنتىنىڭ ءبىرىنشى ۆيتسە- سپيكەرى ماۋري پەككارينەن اتقا مىنۋگە دەگەن قۇشتارلىعىن وياتقان وقيعانى ەسكە الدى، دەپ حابارلايدى «قازاقپارات» ح ا ا ءتىلشىسى.

«ءبىزدىڭ پرەزيدەنتىمىزدىڭ 1992 -جىلى تاۋەلسىز قازاقستانعا جاساعان ءبىرىنشى ساپارىندا سىزدەردىڭ پرەزيدەنتتەرىڭىزدىڭ سىيلىعى كوپتەگەن فيندىكتەردىڭ ءالى ەسىندە. نۇرسۇلتان نازاربايەۆ سىيعا تارتقان جىلقى فينليانديادا ۇزاق ءومىر ءسۇردى. سودان كەيىن فينليانديادا بارلىعى ونى كورگىلەرى كەلىپ، اتقا ءمىنۋدى ۇيرەنۋدى قالادى»، - دەدى دەپۋتات، بۇگىنگى «ق ر تاۋەلسىزدىگىنىڭ 25 جىلدىعى: ناتيجەلەر. جەتىستىكتەر. بولاشاققا كوزقاراس» حالىقارالىق كونفەرەنسياسىندا سويلەگەن سوزىندە.

ماۋري پەككارينەن ەكى ەلدىڭ ۇقساستىقتارىن تىلگە تيەك ەتتى. «فينليانديا، كىشىرەك ەل رەتىندە، باسقالارعا ۇيرەتەرى كوپ جانە تابىستى تاجىريبەسىمەن الماسا الادى. ءبىزدىڭ قوعامنىڭ اشىقتىعى، ءبىلىم بەرۋ ساپاسى، سونداي-اق جەمقورلىقپەن كۇرەس، ءبىزدىڭ دەموكراتيامىزدى (فينليانديا مەن قازاقستان - رەد. ) ۇقساس ءارى جەمىستى ەتەدى»، - دەپ اتاپ ءوتتى فينليانديا پارلامەنتىنىڭ ۆيتسە- سپيكەرى.

ونىڭ ايتۋىنشا، ەكى ەلدىڭ قارىم- قاتىناس جاساسۋعا مۇمكىندىگى زور: ءبىلىم بەرۋ، تەحنولوگيا، ينۆەستيتسيا جانە ساۋدا سالالارىندا تاجىريبە الماسۋ.