قازاقستاندا باراك وبامانىڭ «اۋىلى» بار

استانا. قازاقپارات - شىعىس قازاقستان وبلىسىندا ورنالاسقان باراق اۋىلىنىڭ ەمبلەماسىنا ا ق ش- تىڭ ەكس- پرەزيدەنتى باراك وبامانىڭ سۋرەتى فوتوشوپپەن سالىنعان، دەپ حابارلايدى قازاقپارات.

 ايتا كەتەيىك، عالامتوردا وسى اۋىلدىڭ اتى باراك دەپ جانە اۋىلدىڭ سىرت كەلبەتىنە ا ق ش- تىڭ ەكس- پرەزيدەنتى وبامانىڭ سۋرەتى قويىلعان فەيك- اقپاراتتار تاراپ كەتكەن ەدى.

 قازاقپارات ءتىلشىسى اۋىلدىڭ اكىمدىگىندە حابارلاسىپ، ءمان- جايدى انىقتادى. «ارينە، بۇل - فوتوشوپپەن جاسالعان. اۋىلدىڭ كىرەبەرىسىندە باراك وبامانىڭ سۋرەتى جوق. اۋىلدىڭ ەمبلەماسى تۇر، ءبىراق، ا ق ش- تىڭ ەكس- پرەزيدەنتى وبامانىڭ سۋرەتى جوق. ەمبلەمانىڭ استىندا باراق باتىر اۋىلى دەگەن جازۋ بار»، - دەدى ش ق و كۇرشىم اۋدانىنىڭ مادەنيەت جانە تىلدەردى دامىتۋ ءبولىمىنىڭ جەتەكشىسى باقىتحان ۇلمەسەكوۆ.

ونىڭ ايتۋىنشا، قازىر اۋىلدىڭ ىشكى ساياسات باسقارماسى بۇل ماسەلەنى كوتەرىپ، قۇقىق قورعاۋشىلارعا حاباردار ەتكەن.

انىقتاما: باراق باتىر اۋىلى اۋدان ورتالىعى كۇرشىم اۋىلىنان شىعىسقا قاراي 7 شاقىرىمدا ورنالاسقان. باراق باتىر اۋىلىندا 757 ادام، 188 ءۇي شارۋاشىلىعى تىركەلگەن. اۋىلدا 1 نەگىزگى ورتا مەكتەپ، 1 فاپ، 1 مادەنيەت وشاعى، 1 پوشتا بايلانىس تورابى، 3 ساۋدا دۇكەنى ورنالاسقان. 131 وقۋشى، 129 زەينەتكەر تىركەلگەن. 15 شارۋا قوجالىعى مەن جەكە قوسالقى شارۋاشىلىقتا 1264 باس ءىرى قارا، 283 باس جىلقى، ۇساق مال 3496 باس وسىرىلۋدە.

اۆتور: كەنجەكەي توقتامۇرات قىزى