گۇلنار كاريموۆانىڭ ۇلى اناسىنىڭ ءولىمى تۋرالى اڭگىمەلەردى ءتۇسىندىردى

BBC قىزمەتىنە بەرگەن سۇحباتىندا ول اتالعان اقپاراتتىڭ جالعانىن ەكەنىن ايتتى. 23 جاسار يسلام كاريموۆتىڭ ايتۋىنشا، ونىڭ اناسى ءتىرى. الايدا ول 2014 -جىلدان بەرى ءۇيقاماقتا وتىر. ول سونداي-اق ءوزىنىڭ اپكەسى يمان كاريموۆانىڭ ءۇيقاماقتان بوساتىلعاندىعىن، الايدا وعان ەلدەن سىرتقا شىعۋعا تىيىم سالىنعاندىعىن ايتادى. ال، كىشى كارىموۆ بولسا، لوندوندا ءجۇر، دەپ جازادى Lenta.ru.  

22- قاراشا كۇنى گۇلنار كاريموۆانىڭ ءولىمىن تاشكەنتتەگى دەرەككوزدەرىنە سۇيەنە وتىرىپ، بىرنەشە اقپارات اگەنتتىگى جوققا شىعاردى. بۇرىنعى پرەزيدەنتتىڭ قىزىنىڭ مارقۇم بولعاندىعى جونىندەگى اقپاراتتى وزبەكستاننىڭ ۇلتتىق قاۋىپسىزدىك قىزمەتىنىڭ جاسىرىن قىزمەتكەرىنە سىلتەمە جاساي وتىرىپ، «سەنتر-1» سايتى حابارلادى.

اگەنتتىك تاراتقان مالىمەت بويىنشا، كاريموۆا 5 -قاراشا كۇنى ۋلانىپ ولگەن جانە ونى وسى كۇنى قۇپيا تۇردە «مينور» قورعانىنا جەرلەگەن. دەرەككوز جەرلەۋ راسىمىنە ءوزىنىڭ قاتىسقانىن ايتقان. وسىعان قاراي جۋرناليستەر دە ەل بيلىگىنە بۇرىنعى پرەزيدەنتتىڭ قىزىنىڭ تاعدىرى تۋرالى، ونىڭ قايدا جۇرگەنىن ءبىلۋ ماقساتىندا ارنايى سۇراۋ سالعان. ازىرگە وعان جاۋاپ جوق. قازان ايىنىڭ باسىنا Twitter- دە مارقۇم بولعان پرەزيدەنتتىڭ قىزىنىڭ اتىنا تىركەلگەن جاڭا اككاۋنت پايدا بولدى.

الايدا، جۋرناليستەر ونىڭ گۇلنارعا تيەسىلى ەكەندىگىنە كۇمان كەلتىرىپ وتىر. ال، وندا جاڭا تۇسكەن سۋرەت رەتىندە جاريالانعان فوتولار وسىدان بىرنەشە جىل بۇرىن جاريالانعان. گۇلنار كاريموۆا 1972 -جىلى تۋعان جانە وزبەكستاندا كوپتەگەن مەملەكەتتىك لاۋازىمدى قىزمەتتەردى اتقارعان. 2013 -جىلى جەمقورلىقپەن بايلانىستى اتىشۋلى وقيعانىڭ باستى كەيىپكەرلەرىنىڭ بىرىنە اينالدى.

بۇدان سوڭ ول ءۇيقاماققا الىنعان بولاتىن. ول تۋرالى شىندىققا جاناساتىن ناقتى مالىمەتتەردى گۇلناردىڭ Davidson Ryan Dore پيار اگەنتتىگى ارقىلى قۇپيا تۇردە جىبەرگەن سۋرەتتەرى مەن اۋديوجازبالارىن جاريالاعان باتىستىڭ بۇقارالىق اقپارات قۇرالدارى 2014 -جىلى جاريا ەتتى. 2016 -جىلدىڭ قىركۇيەگىندە ب ا ق وكىلدەرى گۇلناردىڭ اكەسىنىڭ جەرلەۋ راسىمىنە قاتىسپاعانىن جازدى. سونىمەن قاتار جۋرناليستەر كاريموۆتىڭ ورنىن باسقان شاۆكات ميرزيەيەۆتىڭ قازا بولعان ازاماتتىڭ وتباسىنا كوڭىل ايتقان كەزىندە ونىڭ جەسىرى مەن كىشى قىزى لولانىڭ عانا ەسىمىن اتاعاندىعىنا نازار اۋدارعان.