ساكەن مايعازيەۆ: مەنىڭ ورنىما «مۋزارتقا» سايات مەدەۋوۆتى العىسى كەلگەن
جەتىم بالانىڭ مۇڭىن ايتىپ، «بوزتورعايلاتقان» ءانشى تالايلاردىڭ كوز جاسىنا سەبەپشى بولعان ەدى. ول مەيرامبەك ءوستى، جەتىلدى. كينوعا ءتۇستى. كەيىننەن توقتار سەرىكوۆ، ساندۋعاش ستامعازييەۆا، جانار ايجانوۆا سىندى ءبىرقاتار انشىلەرمەن دۋەت جازدىردى. الايدا ونىڭ ناعىز جارىق جۇلدىزى «مۋزارت» توبى قۇرىلعاننان كەيىن جاندى. توپ قالاي قۇرىلدى؟ بۇل تۋرالى 15 جىلدىق تاريحى بار «مۋزارت» توبى «قازاقستان» ارناسىنىڭ «دارا جول» باعدارلاماسىندا ايتىپ بەردى.
ستۋدەنت كەزدەن ءبىر-ءبىرىن تانيتىن كيەلى اۋليە اتا ءوڭىرىنىڭ تۋمالارى مەيرامبەك بەسپايەۆ پەن ماقسات بازاربايەۆ العاشقىدا دۋەت قۇرۋدى ويعا العان. ويلانا كەلە، بۇرىنعى دۋەتتەرىن ەسكەرە كەلە جاڭاشىلدىق ىزدەگەن مەيرامبەك تريو قۇرۋعا ۇسىنىس جاساعان ەكەن. ەكەۋى كەلىسىپ، ءۇشىنشى ءانشىنى ىزدەي باستاعان. اقىلداسا كەلە ەرەكشە قوڭىر ءۇنى بار سايات مەدەۋوۆكە توقتالعان.
«مۋزارت» دەگەن نامىستان جارالعان توپ. ولاي دەيتىنىمىز تەك انا تىلىندە ءان شىرقايتىن انشىلەردىڭ باسىن بىرىكتىرۋ تۋرالى الدىمىزعا ماقسات قويىلدى. سودان كەيىن توپ قۇرىلدى. وعان دەيىن توپتىڭ مۇشەسى بولىپ مەيرامبەك پەن ماقسات «سايلانعان». اقىرىندا ءۇشىنشى ءانشى كەرەك دەپ شەشىپ، ادام ىزدەۋگە كىرىسەدى. سول كەزدە جىگىتتەر سايات مەدەۋوۆكە توقتالۋدى ۇيعارادى. كەيىن ۇشەۋى اقىلداسا وتىرىپ بۇل توپقا ەسترادالىق ءانشى، داۋسى اشىقتاۋ تەنور كەرەك دەپ شەشەدى. سول كەزدە ماقساتتىڭ ەسىنە مەن تۇسەمىن.
ستۋدەنت كەزىمىزدە ەرلانمەن دە، ماقساتپەن دە، مەيرامبەكپەن دە جاقسى ارالاسىپ جۇردىك. اراگىدىك كونسەرتتەردە، سالتاناتتى كەشتەردە ۇشىراسىپ قالاتىنبىز. الايدا شىعارماشىلىق بايلانىستا بولامىز دەگەن وي ءۇش ۇيىقتاساق تۇسىمىزگە كىرمەگەن. ءبىر كۇنى كوشەدەن مەيرامبەكتى كەزدەستىرىپ قالدىم. جىگىتتەر مەنى يتپەن ىزدەپ تاپپاي جۇرگەندەرىن ايتتى. ول كەزدە ۇيالى تەلەفون، قازىرگىدەي ەسەپ بەرىپ وتىراتىن الەۋمەتتىك جەلىلەر جوق. مەيرامبەككە قاي مەيرامحانادا جۇمىس ىستەيتىنىمدى ايتىپ كەتتىم. كەشكە جىگىتتەر كەلىپ، ۇسىنىس جاسادى. اراسىندا تەك انا تىلىندە ءان شىرقاپ جۇرگەن ساكەننىڭ سونداي قورقىنىشتى اكسەنتتەرمەن ءان ايتا بەرەتىنىن كورىپ ۇلگەردى»، - دەدى ساكەن مايعازيەۆ.
