يليننىڭ وكىلى سپورتشىنىڭ وليمپيادا جۇلدەلەرىنەن ايىرىلۋى تۋرالى پىكىر ءبىلدىردى

استانا. قازاقپارات - حالىقارالىق وليمپيادالىق كوميتەتتىڭ شەشىمىمەن ەكى التىن جۇلدەسىنەن ايىرىلعان يليا يليننىڭ پرەسس-اتتاشەسى رومان يلچەنكونىڭ ايتۋىنشا، سپورتشى قازاقستاندىق ب ا ق- قا جاعدايدى ءتۇسىندىرۋدى جوسپارلاپ وتىر، دەپ حابارلايدى قازاقپارات ءتىلشىسى.

«وكىنىشكە قاراي، مەن ونىمەن ءالى سويلەسپەدىم. ءوزىم دە ەشتەڭە بىلمەيمىن ازىرگە، قازىر عانا جاڭالىقتاردان ەستىدىك، ۇلتتىق وليمپيادا كوميتەتىنىڭ باسپا ءسوز قىزمەتىنەن حابارلاپ ايتتى. ونىڭ سۇحبات بەرۋ-بەرمەۋى ءالى بەلگىسىز. ءبىراق جوسپاردا بار»، - دەدى ول.

ەسكە سالا كەتسەك، بۇگىن قازاقستان رەسپۋبليكاسى ۇلتتىق وليمپيادا كوميتەتى حالىقارالىق وليمپيادالىق كوميتەتى تاراپىنان اعزاسىنان تىيىم سالىنعان پرەپاراتتاردىڭ ءىزى تابىلعان 2008 جانە 2012-جىلدارداعى وليمپيادا ويىندارىنا قاتىسقان قازاقستاندىق سپورتشى يليا يلينگە قاتىستى جازا قولدانىلعاندىعى تۋرالى رەسمي حابارلاما الدى.

حالىقارالىق وليمپيادا كوميتەتىنىڭ تارتىپتىك كوميسسياسى 2008-جىلى بەيجىڭدە جانە 2012-جىلى لوندوندا وتكەن وليمپيادا ويىندارىنىڭ جەڭىمپازى، 94 كەلى سالماق دارەجەسىندە ونەر كورسەتكەن قازاقستاندىق اۋىر اتلەت يليا يليننىڭ «ا» جانە «ۆ» دوپينگ سىنامالارىنىڭ قوسىمشا تەكسەرۋ قورىتىندىسى بويىنشا قازاقستاندىق سپورتشىنى سول ويىنداردان شەتتەتىپ، كورسەتكەن ناتيجەلەرىنىڭ كۇشىن جويىپ، جۇلدەلەرىن قايتارىپ الۋ تۋرالى شەشىم شىعاردى.

سپورتشىعا قولدانىلاتىن جازانىڭ مەرزىمىن حالىقارالىق اۋىر اتلەتيكا فەدەراتسياسى (IWF) انىقتايدى.