كاسىپكەر كوشە تازالايتىن قىزمەتكەرلەرگە تەگىن ءشاي تاراتىپ ءجۇر
استانا. قازاقپارات - ادەتتە، كۇز اياعى تاياسا، قىلىشىن سۇيرەتىپ، قىس تا جەتەتىنىن بىلەتىن استانا تۇرعىندارى بيىلعى قاراشادا قىرىق گرادۋستىق اياز تۇسەتىنىن كۇتپەگەن ەدى. ال، وسى ۋاقتا كۇزدىڭ كۇنى ءالى سۋىتپايتىن الماتىعا قاراشا قالىڭ قاردى ءبىراق جاپتى.
جالپى، بۇل ەكى قالا عانا ەمەس، قازاقستاننىڭ باسىم بولىگى قازىر اۋا رايىنىڭ قولايسىزدىعىنان ابىگەرگە ءتۇسىپ جاتىر، دەپ حابارلايدى قازاقپارات.
تۇرعىندار سانى كوپ، اۋماعى ۇلكەن الماتى مەن استانانىڭ كوممۋنالدىق قىزمەتتەرى قار تازالاپ، مۇز قىرىپ ۇلگەرە الماي جاتىر. قار كۇرەيتىن تەحنيكا مەن تالاي اۆتوبۋس ايازعا شىداماي، توقتاپ قالدى. ەندەشە، قولدارىنان كۇرەك تۇسپەي، كۇنى- ءتۇنى كوشە تازالاپ، قار تازالايتىن ادامداردىڭ جاعدايىن ويلاي بەرىڭىز... مىنە، وسىنداي قىزمەتكەرلەردىڭ جاعدايىن ويلاعان كاسىپكەر ەكى قالادا تەگىن ءشاي مەن ىستىق تاماق تاراتۋدى قولعا الدى.
«كەشە جاۋعان قار تاڭعاجايىپ بولدى. قالانىڭ اۋاسى تازارىپ، بالالار ءماز- مەيرام كۇيگە ءتۇستى. الايدا، بۇل كۇن كوممۋنالدىق قىزمەت ءۇشىن اۋىرعا سوعىپ وتىر. سەبەبى، قار ءالى باسىلماعاندىقتان، قالا كوشەلەرىن تازالاپ ۇلگەرە الماۋدا. ارينە، ادەتتەگىدەي، كوممۋنالدىق قىزمەتتىڭ جۇمىسىن سىناي كەتۋگە بولار ەد. الايدا، قاراشادا الماتىدا مۇنشا قار جاۋادى دەپ ەشكىم دە ويلاماعان ەدى. ءبىز، مەيرامحاناداعى ارىپتەستەرىمىزبەن بىرگە كۇنى- ءتۇنى قالا كوشەلەرىن قاردان تازالاپ جۇرگەن وسى جۇمىسشىلاردى قولدايىق دەپ وتىرمىز. بۇگىننەن باستاپ ءبىز ولارعا (ازىرگە 200 ادامعا، ال، جالپى قالادا 2 مىڭنان اسا جۇمىسشى بار دەيدى) ىستىق تاماق پەن ىستىق ءشاي تاسىپ بەرەمىز. بۇل جوسپارلاماعان شارا بولعاندىقتان، ىستىق ءشاي قۇياتىن تەرموستار جەتىسپەي جاتىر. ەگەر دە ءسىزدىڭ ۇيدە تەرموس بولسا، بىرنەشە كۇنگە بەرە تۇرىڭىز، زاتىڭىزدى بۇلدىرمەي، وزىڭىزگە قايتارامىز. بۇل شارانى «تەگىن پيار» دەپ ويلاماڭىزدار، سەل جۇرگەن كەزدە جۇمىسشىلارعا كومەكتەسكەندە الەۋمەتتىك جەلى ارقىلى حابارلاندىرۋ بەرمەگەن ەدىك. سوندىقتان، حالىقتى حابارلاندىرىپ، كومەك سۇراۋ ءتيىمدى ەكەن، سوعان كوزىمىز جەتتى. كۇندەرىڭىز ءساتتى ءوتسىن»، - دەپ جازعان Rumi Group مەيرامحانالار جەلىسىنىڭ باسقارۋشى ارىپتەسى قۋانىش شونباي.
بۇل مەيرامحانالار جەلىسىنىڭ استاناداعى نۇكتەسى دە وسىنداي اكسيا وتكىزىپ، ەلوردانىڭ قاتتى ايازىندا دالادا جۇرەتىن كوممۋنالدىق قىزمەتتىڭ جۇمىسشىلارىنا ىستىق تاماق پەن ىستىق ءشاي تاراتىپ ءجۇر.
اۆتور: كەنجەكەي توقتامۇرات قىزى
