استانادا جاس اقىندار ءمۇشايراسى مەن جىر-تەرمەشىلەر بايقاۋى وتەدى
قالالىق تىلدەردى دامىتۋ باسقارماسىنىڭ حابارلاۋىنشا، ءمۇشايرا جانە بايقاۋعا شارت بويىنشا 16-30 جاس ارالىعىنداعى ۇمىتكەرلەر قاتىسۋ كەرەك. كەش بارىسىندا الدىن-الا ىرىكتەلگەن جاستار تاۋەلسىزدىككە ارنالعان جانە ەركىن تاقىرىپتاعى تۋىندىلارىن وقيدى، جىر-تەرمەلەرىن ورىندايدى. شارا بارىسىندا تانىمال ونەرپازدار ونەر كورسەتەدى. شارانىڭ ماقساتى - تاۋەلسىزدىك پەن مەملەكەتتىلىكتىڭ ماڭىزدىلىعىن جاس ۇرپاقتىڭ ساناسىنا ءسىڭىرۋ ارقىلى ولاردى وتان سۇيگىشتىككە، ەل جاندىلىققا باۋلۋ.
شىعارماشىل جاستاردىڭ ونەرىنە قولداۋ كورسەتە وتىرىپ، مەملەكەتتىك ءتىلدىڭ قولدانىس اياسىن كەڭەيتۋ، ولەڭ - ءسوز قۇدىرەتى ارقىلى قازاق ءتىلىنىڭ مارتەبەسىن كوتەرۋ. كەشتى تانىمال اقىن قالقامان سارين، بەلگىلى ايتىسكەر اقىن سەرىكزات دۇيسەنعازى جۇرگىزەدى. سايىس قورىتىندىلارى بويىنشا جەڭىمپازدارعا ارنايى جۇلدەلەر مەن ديپلومدار تاپسىرىلادى.
جىر دوداسىنا بەلگىلى ادەبيەتشى، قازاق جانە شىعىس ادەبيەتتانۋ عىلىمدارىنىڭ سالىستىرمالى پراكتيكالىق نەگىزىن قالىپتاستىرۋشى ءىلياس رىسبەك ۇلى، ايتىسكەر اقىن، قازاقستاننىڭ ەڭبەك سىڭىرگەن قايراتكەرى امانجول ءالتاي، اقىن، «شابىت» حالىقارالىق جاستار فەستيۆالىنىڭ لاۋرەاتى اسىلزات ارىستانبەك جانە جىر-تەرمە بايقاۋىنا ق ر مادەنيەت قايراتكەرى، قازاق ۇلتتىق ونەر ۋنيۆەرسيتەتىنىڭ جانىنداعى قورقىت اتا اتىنداعى عىلىمي-زەرتتەۋ ينستيتۋتىنىڭ قازاق اقىندارى، جىراۋ، شەشەندىك ونەر زەرتحاناسىنىڭ جەتەكشىسى، پروفەسسور اماندىق كومەك ۇلى، ق ر مادەنيەت قايراتكەرى، بەلگىلى ءانشى كلارا تولەنبايەۆا، اقىن، «اباي تانۋ» ورتالىعىنىڭ ديرەكتورى الماحان مۇحامەتقالي قىزى قازىلىق ەتەدى.
اتالعان رۋحانيات كەشىنە جازۋشىلار وداعىنىڭ مۇشەلەرى، بەلگىلى قالامگەرلەر، عالىمدار، زيالى قاۋىم وكىلدەرى، جاس اقىندار، بەلسەندى جاستار جانە ت. ب. شاقىرىلعان.
