شىمكەنتتە كوشە جارنامالارىنىڭ ساۋاتتىلىعى تەكسەرىلدى

استانا. قازاقپارات - قازاقستان رەسپۋبليكاسىنداعى «ءتىل تۋرالى»، «جارناما تۋرالى» زاڭدارى تالاپتارىن ورىنداۋ جانە شىمكەنت قالاسىنداعى كورنەكى اقپاراتتاردىڭ، جارناما ماتىندەرىنىڭ تاقىرىپتىق ماڭىزدىلىعى مەن ساۋاتتىلىعىن، ەستەتيكالىق بەزەندىرىلۋ دەڭگەيىن كوتەرۋ ماقساتىندا وڭتۇستىك قازاقستان وبلىستىق تىلدەردى دامىتۋ، ارحيۆتەر مەن قۇجاتتاما باسقارماسى، شىمكەنت قالاسىنىڭ اكىمدىگى، وبلىستىق جاستار ساياساتى ماسەلەلەرى باسقارماسى، وبلىستىق كاسىپكەرلەر پالاتاسىمەن بىرلەسىپ، «ساۋاتتى جارناما - قالا كوركى» اكسياسىن وتكىزدى.

الدىمەن اكسياعا قاتىسۋشىلار كەڭەس وتكىزىپ، الدا اتقارىلار جۇمىستار جايىن سارالادى. وبلىستىق تىلدەردى دامىتۋ، ارحيۆتەر مەن قۇجاتتاما باسقارماسى باسشىسىنىڭ ورىنباسارى قاسىم اعابەكوۆتىڭ ايتۋىنشا وڭىرىمىزدە 1 وبلىستىق، 15 اۋداندىق، قالالىق دەڭگەيدە ناسيحات توپتارى جوسپار اياسىندا 145 ءتۇسىندىرۋ ءىس- شارالارىن جۇرگىزگەن. بۇگىندە وبلىستاعى 8224 كوممەرتسيالىق نىساننىڭ ماڭدايشا، جارناما جازۋلارىنىڭ 7709 ى زاڭعا سايكەس جازىلعان. زاڭ تالاپتارىنا ساي كەلمەيتىن 515 جارناما ماتىندەرىنىڭ 232 سى رەتتەلگەن.

ال، قالعان 283 پروبلەمالىق نىساندار بويىنشا ءتيىستى جۇمىستار اتقارىلۋدا. ءتىل جاناشىرلارى مەن شىمكەنتتىك بەلسەندى جاستار جانە بۇقارالىق اقپارات قۇرالدارىنىڭ وكىلدەرى قاتىسقان اكسيا بارىسىندا «شىمكەنت اۋەجايى»، «شىمكەنت» تەمىرجول ۆوكزالى، «Mega planet» ساۋدا ورتالىعى سىندى ءبىرقاتار نىسانداردا ءتۇسىندىرۋ شارالارى جۇرگىزىلدى.