رەسەيدە قازاقستاندىق ۆاحتاشىلار مىنگەن اۆتوبۋس قاتىپ قالا جازدادى

اۆتوبۋس توبىل قالاسىنان قوستانايعا كەلە جاتقان. جاعارماي مۇز بولىپ قاتىپ، اۆتوبۋس قوزعالتقىشى ىستەن شىققان. كەزەكشىلىككە شىققان جول قوزعالىسى قاۋىپسىزدىگى جونىندەگى مەملەكەتتىك ينسپەكتسيا ولاردى دەر كەزىندە تاۋىپ الدى، دەپ حابارلايدى «كومسومولسكايا پراۆدا- تيۋمەن».

جول- پاترۋل قىزمەتى ت ج م شاقىرىپ، جولاۋشىلارعا ءوز تەرموستارىنان شاي قۇيىپ بەردى. ەمبايەۆو اۋىلدىق اكىمشىلىگىنىڭ باسشىسى ۋاقىتشا تۇرۋ ورنىن دايىندادى. ۆاحتاشىلاردىڭ ەشقايسىسى زارداپ شەككەن جوق. وبلىستاعى مەملەكەتتىك اۆتوينسپەكسيانىڭ حابارلاۋىنشا، قوزعالىس قاۋىپسىزدىگى ءۇشىن جولاقتاردىڭ ءبىرى ۋاقىتشا جابىلدى، دەسە دە كولىك قوزعالىسىندا ەش قيىندىق تۋىنداعان جوق.

اۆتوبۋس وتالدى جانە جولاۋشىلار جاقىن ارادا جولعا شىعادى. ءبىراق، اۆتوبۋسقا تەحنيكالىق تەكسەرۋ جۇرگىزۋ بارىسىندا قاۋىپسىزدىك بەلبەۋلەرىنىڭ جوق ەكەنى انىقتالىپ، تەحنيكالىق جارامسىز دەپ تانىلدى.