قاراعاندىلىق ستۋدەنتتەر ۋنيۆەرسيادا الاۋىن دومنا پەشىنەن جاعادى
«قازىر وبلىستىق ج و و- لاردا الاۋ ۇستاۋشىلار ىرىكتەلىپ جاتىر. 150 ستۋدەنتتەن ءوتىنىم ءتۇستى، ال بىزگە كەرەگى 60 ادام. الاۋ ەستافەتاسىن وتكىزۋدىڭ جەرگىلىكتى شتابى جانىنداعى كوميسسيا 1- جەلتوقسانعا دەيىن ءتىزىمدى جاساقتايدى»، - دەدى وبلىستىق دەنە تاربيەسى جانە سپورت باسقارماسىنىڭ جەتەكشىسى ناتاليا سۋحورۋكوۆا.
ونىڭ ايتۋىنشا، ىرىكتەۋدە كانديداتتىڭ وقۋداعى، سپورتتاعى، قوعامدىق ومىردەگى جەتىستىكتەرى، ازاماتتىق پوزيتسياسى ەسكەرىلەدى. جوسپار بويىنشا، قاراعاندى وبلىسىندا الاۋ ەستافەستاسى 2017-جىلى 26- قاڭتاردا وبلىس ورتالىعىندا جانە تەمىرتاۋ قالاسىندا وتەدى. باعىتتىڭ ۇزىندىعى - 12 شاقىرىم.
«ءراسىم تەمىرتاۋ قالاسىنداعى مەتاللۋرگيالىق كومبيناتتان باستاۋ الادى. پرەزيدەنتتىڭ قىزمەتتەس سەرىگى مەن قاراعاندى مەملەكەتتىك يندۋستريالىق ۋنيۆەرسيتەتىنىڭ ستۋدەنتتەرى الاۋدى دومنا پەشىنىڭ جالىنان جاعادى. سونىمەن قاتار، قاراعاندى مەملەكەتتىك تەحنيكالىق ۋنيۆەرسيتەتى، تاۋ-كەن فاكۋلتەتىنىڭ ستۋدەنتتەرى شاحتاعا ءتۇسىپ كومىر الادى، ونى «قاراعاندى ارەنا» مۇز سارايىنا الاۋدىڭ نەگىزگى توستاعانىنا اكەلەدى»، - دەپ ن. سۋحورۋكوۆا شارا سەناريىمەن تانىستىردى.
سالتاناتتى ميتينگتەن كەيىن ەستافەتا قاراعاندىعا باعىت الىپ، مۇز سارايىندا اياقتالادى. وقيعانىڭ شارىقتاۋ شەگى رەسەيلىك مۇز بالەتى ارتىستەرىنىڭ قاتىسۋىمەن وتەتىن مەرەكەلىك شوۋ بولماق. «مۇز ارەناسىندا دومنا پەشىنەن الىنعان الاۋ مەن ستۋدەنتتەر اكەلگەن كومىر بىرىكتىرىلىپ، نەگىزگى توستاعانداعى الاۋ جاعىلادى»، - دەپ تولىقتىردى سپورت باسقارماسىنىڭ جەتەكشىسى. ۋنيۆەرسيادادا قاراعاندى وبلىسىنان 14 سپورتشى شايبالى حوككەي، شاڭعى جارىسى، كونكيمەن جۇگىرۋ سپورتى، مانەرلەپ سىرعاناۋ، بياتلون سەكىلدى سپورتتىڭ بەس ءتۇرى بويىنشا سايىسقا تۇسەدى.
28- بۇكىل الەمدىك قىسقى ۋنيۆەرسيادا الماتىدا 2017-جىلدىڭ 29- قاڭتارىنان 8- اقپانىنا دەيىن وتەدى. الەمنىڭ 56 ەلىنەن كەلگەن 2 مىڭعا جۋىق سپورتشى سىنعا تۇسەتىنىن راستادى. الاۋ ەستافەتاسى رەسپۋبليكانىڭ بارلىق وبلىس ورتالىقتارىندا وتەدى. الاۋ ەستافەتاسىنا ەلىمىزدىڭ ەڭ ۇزدىك 1000 ستۋدەنتى قاتىسادى. ءار ءوڭىردىڭ ءوز الاۋ جاعۋ ءراسىمى وتەدى دەپ جوسپارلانۋدا.
