ترامپ اق ۇيگە ءبىرىنشى رەت ساپارلاپ بارادى
استانا. قازاقپارات-دونالد ترامپ 10 - قاراشادا ا ق ش پرەزيدەنتى سايلاۋىندا جەڭىسكە جەتكەننەن كەيىن ءبىرىنشى رەت اق ۇيگە بارادى. ونى اق ۇيگە كەلىپ قايتۋعا 9 - قاراشادا پرەزيدەنت باراك وباما شاقىرعان.
دونالد ترامپ سايلاۋدا دەموكراتيالىق پارتيا كانديداتى حيللاري كلينتوننان كۇتپەگەن جەردەن باسىم تۇسكەننەن بىرنەشە ساعاتتان سوڭ باراك وباما «كوزقاراس قايشىلىعىنا» قاراماستان بيلىكتى جاڭا سايلانعان پرەزيدەنتكە پاراساتتى تۇردە تاپسىرۋدىڭ بارلىق شاراسىن جاساۋعا ۋادە بەرگەن. وباما بۇدان سوڭ كوشەدە نارازىلىق تانىتىپ جاتقاندارعا شىعىپ، ترامپقا قارسى داۋىس بەرگەن جانە ونىڭ سايلانۋىن الىگە دەيىن قابىلداماي جاتقان دەموكراتتارمەن سويلەستى.
«ءبىز ءىس جۇزىندە بارلىعىمىز ءبىر كوماندادامىز. ءبىز ەڭ الدىمەن دەموكرات ەمەسپىز، رەسپۋبليكاشىل ەمەسپىز. ءبىز ەڭ اۋەلى امەريكالىقپىز، پاتريوتپىز» دەدى وباما.
دونالد ترامپتىڭ يناۋگۋراتسياسى 20 - قاڭتارعا بەلگىلەندى. ول ا ق ش- تى سەگىز جىل بويى (ءتورت جىلدان ەكى مەرزىم) باسقارعان وبامادان بيلىكتى قابىلداپ الادى.
