ول جۇرگەن سوڭعى كوشە

قايدا بارا جاتىر؟ كىم ءۇشىن؟ نە ءۇشىن؟ بۇل سۇراقتار ونى قىزىقتىرمايدى. ەشكىمگە تاۋەلسىز ءومىرىنىڭ راحاتىن ەندى سەزىنەيىن دەدى- اۋ شاماسى.. . ەكى كوشە قيىلىسىنداعى ماڭدايشاسى تانىس دۇكەنگە كوزى تۇسىسىمەن، اياق الىسىن لەزدە سول جەردە توقتاتتى. مىڭ سۋرەتىنىڭ بىرىنە «فون» بولعان سول كەزدىڭ ەلەسى ونى ەرىكسىز ءبىر جىميتىپ الدى. بويىندا ۇرەي سەيىلگەن. قورىقپايدى. قورىققان دۇنيەسىنىڭ تاعدىر تاقتاسىندا «قارعىس اتقان قوناق» بولىپ شىعارىن ول بىلەدى.

 كوشەدە مازاسىز كۇي. ايازى توڭدىرىپ، بورانى ىسقىرىپ بارادى. بار تىرشىلىك تىنىشتىقتى قالايدى. تۇربالار ورنىندا. ماڭايدا ءىز جوق. بۇل جەردىڭ جانعا جايلى ەڭ ادەمى جەر ەكەنىن ادامدار بىلمەيتىن سىقىلدى. ول «اۆتور» بولعان اسقاق- اسقاق ارمانداردى قارا جەر الدەقاشان باۋىرىنا باسىپ، سۋىقتا سىزىن سەزدىرمەس ءۇشىن اق قارمەن الداپ قويعان. قىز قارايدى دا كۇلەدى. كۇلەدى دە جىلايدى. جايقالعان باعىن باتپانداي سورعا قيمايدى. ول بۇل كوشەگە ەندى قايتا اينالىپ كەلمەيدى. ۇنەمى الدىنان باتا بەرىپ وتەتىندەي اناۋ اقساقالدى دا كورمەيدى. ەندى ول بانان جەمىسىن دە سۇيمەيدى. الىستان تاتتىلەردى كۇتپەيدى. بولاشاق بازارىنىڭ باقىتتى باعبانىنا ارناپ گۇلزار باعىن كۇيتتەيدى. ول بۇگىن قوشتاسۋعا كەلمەدى. ۇمىتۋ ءۇشىن جەك كوردى. وتكەنى ءۇشىن كەكتەندى. اتتەەڭ، ءبارى بەكەر.. . كەشىرە ءبىلۋ ءۇشىن دە جاقسى كورۋ ءومىر زاڭدىلىعى ەكەنىن كەش ءبىلدى

 سەندەر ءالى- اق مويىندايسىڭدار! ءومىر تەك تاڭداۋدان تۇرادى. ەشكىمنىڭ ەنشىسىنە تيمەگەن جاقۇتقا جەتۋ ءۇشىن ، «مەندىك» دەگەن قۇنى قىمبات التىننان دا باس تارتا ءبىلۋ قاجەت. سەندەر ءالى- اق كورەسىڭدەر! السىزدەردىڭ ءالىن ۇنەمى كۇشتىلەر پايدالانا بەرمەيدى. مىقتىلاردىڭ دا جەر ۇرىپ جەڭىلەتىن كۇنى تۋادى ءالى. تەك مىنانى ۇمىتپاڭدار: «اركىم ءوز باقىتىنىڭ قۇلى» .. . ىشتەي دولدانىپ، الگى قىز كوز ۇشىندا ۇزاپ بارادى. ارتىنا بۇرىلىپ قارامادى. كوشەدەگى «تىرشىلىك» اتاۋلىسى دا وعان قاراپ ءۇن قاتپادى. توقتاتپادى. العاش ءوزىن باقىتتى سەزىندى. ول «كەتسە، قايتا كەلمەيتىن» ۇزااق ساپارعا اتتاندى. عاشىقتىق اۋىلىنا.. . ول ءوز كوكتەمىنە اسىق. كەلەر جازىن وزىمەن جارىسا كۇتەتىن ءبىر جانعا ماڭگى عاشىق.

ولاردىڭ ايتەۋىر ءبىر كۇنى كەزدەسەتىنى انىق. تەك قاي كوشەدە؟ تاعدىرعا عانا ءمالىم، بەيمازا سۇراق.. .

massaget.kz