تۇڭعىشباي جامانقۇلوۆ ەلباسىنان اراشا سۇرادى - كەسكىن
استانا. قازاقپارات - تومەندەگى ۆيدەو كەشە youtube جەلىسىندە جاريالاندى. ۆيدەوعا قوسا بەرىلگەن تۇسىنىكتەمەدە: «بۇل ۆيدەو 2016-جىلدىڭ 17-قازانىندا، تۇڭعىشباي جامانقۇلوۆ ۇستالاردان ءبىر اپتا بۇرىن تۇسىرىلگەن.
بۇگىنگى كۇنگە دەيىن تۇڭعىشباي قادىر ۇلىنىڭ قالاۋى بويىنشا جاريالانعان جوق. ول كىسى قۇقىق قورعاۋ ورگاندارىنىڭ «فەنيكس» فيلمىنە بولىنگەن اقشا قاراجاتىن جىمقىرۋ فاكتىسى بويىنشا ءىستى ءادىل تەرگەيتىنىنە ۇمىتتەندى. ءبىراق تۇڭعىشباي جامانقۇلوۆتىڭ 69 ميلليون تەڭگەنى ۇرلاعانى دالەلدەنبەي، ۋشىعىپ تۇرعان جاعدايدى ەسكەرىپ وسى ۆيدەونى جاريالاۋ تۋرالى شەشىم قابىلداندى» - دەپ جازىلعان.
ۆيدەودا اكتەر مادەنيەت ءمينيسترى ارىستانبەك مۇحامەدي ۇلىمەن باس ارازدىعىنىڭ بولعانىن، فيلمگە بولىنگەن قاراجاتتى «قازاق ەلى» سەريالىنا اۋدارىپ جىبەرگەنىن، تالعات جانىبەكوۆتىڭ شالىس باسىپ، ءمينيستردى ايىپتاپ اعات قىلىق جاساعانىن، ءوزىنىڭ ەڭلىك سىدىقوۆانى قورعاپ، جۋرناليسكە ۆيدەو سۇحبات بەرگەنىن، ارىستانبەك مۇحامەدي ۇلىمەن ءتۇسىنىسۋ ءۇشىن استانادا كەزدەسكەنىن، كەشىرىم سۇراعانىن مويىنداي وتىرىپ، ءبىراق مادەنيەت ءمينيسترىنىڭ مامىلەدەن باس تارتقانىن، «بالا-شاعاڭ قاڭعىرىپ قالادى» دەپ قوقان-لوققى كورسەتكەنىن، قيسىنسىز ايىپ تاعىپ، تالاپ قويعانىن ايتقان.
ءسوز سوڭىندا اكتەر ەلباسىدان ءوزىن قورعاۋىن سۇراعان. قابىلداۋىن ءوتىنىپ، كوزبە-كوز كەزدەسۋگە نيەتتى ەكەنىن دە جەتكىزگەن.
