ارباعا تاڭىلعان جىگىتتىڭ ءومىرىن سۇيىكتىسى قالاي وزگەرتتى؟ - فوتو
جەدەل اۋرۋحاناعا جەتكىزىلىپ، ارتىنشا ارباعا تاڭىلاتىنى انىقتالادى. دەسە دە، جىگىت تاعدىردىڭ قاتال سىنىنا ەش مويىماعان. بۇگىندە ول «جاس وتان جاستار قاناتىنىڭ» بەدەلدى مۇشەسى ءارى ادال جار مەن سۇيىكتى وتاعاسى. ول وتاندىق باعدارلامادا العاش رەت باسىنان وتكەن وقيعانى بايانداپ بەردى.
مۇنىمەن قاتار، ءومىرىن تۇبەگەيلى وزگەرتكەن سۇيىكتىسىنە العىس ايتتى.
بۇل تۋرالى «ايەل باقىتى» باعدارلاماسىندا ايتىلدى.
«جارىم ەكەۋىمىز 2003-جىلى تانىستىق. ول كەزدە ەكەۋىمىز دە الماتى قالاسىنىڭ ستۋدەنتتەرى ەدىك. مەديتسينا كوللەدجىندە اۋديتوريالاردىڭ اراسى شكافتارمەن ءبولىنىپ تۇراتىن. ول ەكىنشى توپتىڭ ستاروستاسى بولدى. مىنەزى پىسىق، ۇنەمى مۇعالىمنىڭ ورنىنا ءدارىس وقيتىن. توبىن العا سۇيرەپ جۇرەتىن. ءبىراق، ءبىر-ءبىرىمىزدى بۇل ۋاقىتتا دۇرىس تانىمايتىن ەدىك. ونىڭ ۇستىنە تەلەفون دا بولمادى. ءبىر كۇنى قاعازعا «داۋسىڭ قانداي ادەمى» دەپ جازىپ وعان لاقتىرىپ جىبەرەمىن. ول وقىپ، كەيىن ءدارىستى ارى قاراي جالعاستىرا بەرەدى. مەن استاناعا اۋىسقان سوڭ ارامىز سۋىپ كەتتى. سول جاقتا مامان بولىپ قالىپ قويدىم»، - دەيدى ارنۇر.
جىگىتتىڭ ءسوزىن جارى لاۋرا جالعادى. باستاپقىدا ونى ءوزىنىڭ دە ۇناتقانىن جاسىرمادى.
«دارىستەن شىققان سوڭ، جانىما كەلدى. ەكەۋىمىز جاقسىلاپ تانىستىق. مەن الگى حاتتى كىم لاقتىرعانىن بىلەتىن ەدىم. ويتكەنى، ارنۇردىڭ رينات ەسىمدى دوسى ونىڭ ماعان دەگەن سەزىمى تۋرالى ايتىپ قويعان بولاتىن. مەن دە سىرتىنان قارايلاپ، ۇناتتىم. ءسوز سالدى، ءبىراق قىز-جىگىت بولىپ جۇرمەدىك. كوللەدجدە وقىپ جاتقانىمىزدا، ۇيالى تەلەفون جاڭادان شىعىپ جاتتى. بىزدە بولعانىمەن، ءبىر-ءبىرىمىزدىڭ ءنومىرىمىز بولمادى. ەكەۋىمىز وقۋ بىتىرگەن سوڭ، ارامىز ءۇزىلىپ كەتتى. ارنۇردىڭ اكەسى ريناتقا حابارلاسىپ بولعان قايعىلى جاعدايدى بايانداپ بەرەدى. رينات مەنى ىزدەپ تاۋىپ، بارلىعىن ايتادى. ءالى كۇنگە دەيىن ريناتتىڭ مەنى قانداي ماقساتتا ىزدەگەنىن بىلمەيمىن. باستاپقىدا «نەگە بۇل قىز ون ەكى مۇشەسى ساۋ بولا تۇرا بۇل جىگىتكە قارادى؟» دەگەن سەكىلدى سىني پىكىرلەر بولدى.
ەلدىڭ مەنىڭ ومىرىمە ارالاسۋعا قۇقىعى جوق. بۇل - تەك مەنىڭ ءومىرىم. ەڭ باستىسى، تاڭداۋىمدى اكە-شەشەم قۇپتادى. قالعان ادامنىڭ پىكىرى مەن ءۇشىن ماڭىزدى ەمەس. مەن ارنۇردى شىن جاقسى كورەمىن. بولدى! قۇدايعا شۇكىر، كوپ ۇرىسپايمىز. وتباسى بولعان سوڭ، كىشىگىرىم كيكىلجىڭدەر بولىپ تۇرادى. قازىر كەرىسىنشە كوپ ادام باتاسىن بەرىپ جاتادى»، - دەيدى ارنۇردىڭ كەلىنشەگى.
ارنۇر قۇتقارماق بولعان 8-سىنىپ وقۋشىسى ازىلدەپ جىگىتتەردى كومەككە شاقىرعان ەكەن. دەسە دە، ارباعا تاڭىلعان ازامات وعان ەش رەنجىمەيتىنىن ايتادى. مۇنىمەن قاتار، ەكى جىلداي ءىش-قۇسا بولىپ، جۇرتپەن ارالاسپاعانىن دا تىلگە تيەك ەتتى. ونىڭ ومىرگە قايتا ورالىپ، قوعاممەن تىعىز ارالاسۋىنا ايەلى مەن 3 جاسار قارىنداسى سەبەپشى بولعان ەكەن.
«اياق استىنان دوستارىم شاقىرىپ، بىرگە كولگە باردىق. جالپى جاقسى جۇزەمىن. جۇرتتى باتىپ جاتقانىن ايتىپ، كومەككە شاقىرعان قىز 8-سىنىپتا وقيدى. سونى قۇتقارماق بولىپ سەكىرگەنىمدە، باسىمدى قاتتى زاتقا ۇرىپ الدىم. وسىنىڭ سالدارىنان مويىن ومىرتقاما زاقىم كەلدى. دوستارىم شىعارىپ، بىردەن اۋرۋحاناعا جەتكىزدى. وتا جاسالىپ، ارباعا تاڭىلدىم. الگى قىز بار بولعانى جىگىتتەردىڭ نازارىن وزىنە اۋدارتپاق بولعان ەكەن. ارينە، ونى كىنالامايمىن. ويىننان ءورت شىقتى دەگەن وسى عوي.
2010-جىلى جارىم ەكەۋىمىز ءبىر-ءبىرىمىزدى تاۋىپ، 2013-جىلى ۇيلەندىك. ەكى جىلداي ەشكىممەن سويلەسپەدىم. مەن توسەك تارتىپ جاتقاندا ءۇش جاسار قارىنداسىم ماعان قارايلاپ، تاماق بەرەتىن. ارى-بەرى اۋناتىپ، تۇرۋىمدى وتىنەتىن. سول قارىنداسىم ماعان ءومىردى ءسۇيۋدى ۇيرەتتى.
ال جارىم ومىرگە دەگەن كوزقاراسىمدى تۇبەگەيلى وزگەرتتى. تاۋبە، قازىر بارلىعى جاقسى. بۇل جاعدايدى تولىقتاي قابىلدادىم. ءارتۇرلى كينو كوردىم. ومىرگە كەلگەن سوڭ، ونى ءسۇيۋ كەرەك»، - دەيدى ارنۇر.
ازامات ءدال قازىر ەۋرازيا ۋنيۆەرسيتىندە ماگيستراتۋرادا ءبىلىم الىپ جاتىر. مۇنىمەن قاتار، «جاس وتان جاستار قاناتىنىڭ» بەدەلدى مۇشەسى. نازارلارىڭىزعا ارنۇر ىسقاقوۆتىڭ سۇيىكتىسى لاۋراعا ارناعان ولەڭىن ۇسىنامىز:
اسىل جار، اياۋلى جار، قۇداي قوسقان،
ءوزىڭسىز كوڭىلىمدى مۇنار باسقان.
ەگەر دە سەن بولماساڭ، كوكتە كۇن مەن،
كوگىمدە كۇلىمسىرەپ تۇرار ما اسپان؟!
جاراتقان ۇلدا بەردى، قىز دا بەردى،
تۇسىمە ەنە المايدى قىزدار ەندى.
ءوزىڭسىڭ باق جۇلدىزىم جارقىراعان،
تابامىن جۇرەگىڭنەن ىزگى الەمدى.
ۋىق قوستىڭ سەن مەنىڭ ۋىعىما،
جىلىنامىن جانىڭنىڭ جىلۋىنا.
جار بولعالى ءوزىڭدى ۇمىتقانسىڭ،
وبەكتەپ مەنىڭ ىستىق - سۋىعىما.
شاتتىعىن تىرشىلىكتىڭ تەڭ ءبولىسىپ،
اققۋداي ايالايسىڭ كولبەپ ۇشىپ.
قىلىعىڭ، ەركەلىگىڭ، نۇرلى ءجۇزىڭ،
سوناۋ ءبىر، العاش كورگەن، كەزدەن ىستىق.
اياۋلىم، جاۋلاپ العان ەر جۇرەگىڭ،
الپەشتەپ اناما ۇقساپ ەلجىرەدىڭ.
بار باقىتىم ءبىر مەنىڭ باسىمداعى
قاراشى، جانارىڭدا مولدىرەۋىن.
