ازەربايجانداعى انار مەرەكەسى قالاي وتەدى؟
بۇگىندە ازەربايجاندا ءتىپتى وسى جەمىسكە ارنالعان مەرەكە دە بار، ول بيىل 11- رەت اتالىپ وتۋدە. قالىپتاسقان ءداستۇر بويىنشا قازان ايىنىڭ سوڭى مەن قاراشا ايىنىڭ باسىندا انار ءوندىرۋ ورتالىعى سانالاتىن ازەربايجاننىڭ گەوكچاي اۋدانىندا وسى جەمىس ءتۇرىنىڭ جيىن-تەرىمىنىڭ اياقتالۋ قۇرمەتىنە وراي انار فەستيۆالى ۇيىمداستىرىلادى.
ايتا كەتەيىك، مۇندا گرانات جەمىسىنىڭ بارلىق تۇرلەرى وندىرىلەدى. قازاقپارات تىلشىسىنە مەرەكەنىڭ قالاي اتالىپ وتەتىنىن ءوز كوزىمەن كورۋدىڭ ءساتى ءتۇستى. فەستيۆالعا ادەتتە انار وسىرەتىن شارۋاشىلىعى بار ازاماتتار قاتىسادى جانە ولار مەرەكەگە وزدەرىنىڭ ونىمدەرىن الىپ كەلىپ، حالىققا ۇسىنادى.
انار ءتۇرلى كولەمدە بولادى. ولاردىڭ ەڭ ۇلكەندەرىنىڭ سالماعى 1,5 كەلىگە جەتەدى. سۋرەتتە سالماعى 1100 گرام تارتاتىن جەمىس. فەستيۆالدا قالىڭ كوپشىلىككە جەمىسى جۇلىنباعان انار اعاشتارى دا كورسەتىلدى.
مەرەكەگە قاتىساتىن ۇجىم مۇشەلەرى اناردىڭ داندەرىنەن تۋ، ەلتاڭبا، كارتا سياقتى رامىزدەردى جانە وزگە دە كوپتەگەن دۇنيەلەردى بەينەلەيدى. مەرەكەدە انار شىرىنى مەن وزگە دە جەمىستەردى دايىنداۋدىڭ ءداستۇرلى ءادىسى كورسەتىلدى.
جىل سايىن انار باقشالارىندا ونداعان مىڭ توننا جەمىس جينالادى دا ولاردىڭ ءبىرازى شەت مەملەكەتتەرگە جونەلتىلەدى. قالاي دەگەنمەن ءتىل ۇيىرەتىن ەڭ ءدامدى، ەڭ بالعىن اناردى جانە ولاردان دايىندالاتىن تاعامداردى تەك وسى مەرەكەدە عانا كەزدەستىرۋگە بولادى.
اناردى تەك تاعام رەتىندە عانا ەمەس، ەمدىك ماقساتتا دا پايدالانادى. مىسالى، انار تالىنىڭ تامىرىن اۋرۋدى باسۋ ءۇشىن قولدانسا، شىرىنىن قان قىسىمىن تۇراقتاندىرۋ ءۇشىن پايدالانادى، ال جەمىستىڭ جۇمساعىن تابەتتى ارتتىرۋ ءۇشىن تۇتىنۋعا بولادى.
مەرەكەگە وتە ۇلكەن ماڭىز بەرىلەدى. ويتكەنى وعان تەك ازەربايجاندىقتار عانا ەمەس، شەت مەملەكەتتەردەن تۋريستەر دە جينالادى. فەستيۆالعا جوعارى دارەجەلى مەملەكەتتىك قىزمەتكەرلەر مەن ديپلوماتيالىق كورپۋس وكىلدەرى جانە كورشىلەس مەملەكەتتەردىڭ ازاماتتارى دا كەلەدى. ازەربايجاندىقتار اناردى «جەمىستىڭ سۇلتانى» دەپ اتايدى.
