باۋىرجان بايبەك ەلوردادا الماتى تۋرالى كورمەنى اشتى - فوتو

استانا. قازاقپارات - الماتى اكىمى باۋىرجان بايبەك ق ر ۇلتتىق مۋزەيىندە «الماتى - تاۋەلسىزدىكتىڭ التىن بەسىگى» اتتى مۋلتي مەديالىق كورمەسى مەن الماتى تۋرالى فوتوكورمەنى اشتى، دەپ حابارلايدى قازاقپارات ءتىلشىسى.

 «تاۋەلسىزدىكتىڭ العاشقى جىلدارى الماتىدا مەملەكەتىمىزدەگى ماڭىزدى شەشىمدەر قابىلداندى: تاۋەلسىزدىك تۋرالى دەكلاراتسيا، كونستيتۋتسيا قابىلداندى، ۇلتتىق ۆاليۋتامىز - تەڭگەنىڭ ەنگىزىلۋى. ءتىپتى سەمەي پوليگونىنىڭ جابىلۋى تۋرالى شەشىم دە الماتىدا قابىلدانعان»، - دەپ اتاپ ءوتتى كورمەنىڭ اشىلۋىندا ءسوز سويلەگەن اكىم.

 استانا جۇرتشىلىعىنا مەملەكەتتىلىگىمىز بەن تاۋەلسىزدىگىمىزدىڭ قاينار كوزىن سيپاتتايتىن الماتى تاريح مۋزەيى قورىنان ەكسپوناتتار ۇسىنىلعان. كورمەنىڭ مۋلتيمەديالىق كونتەنتىن جەتىسۋعا جانە كونە داۋىردەن وسى ۋاقىتقا دەيىنگى كەزەڭدى قامتيتىن العاشقى قازاقستاندىق مەگاپوليسكە ارنالعان بىرەگەي تاريحي سۋرەتتەر قۇرايدى. سونداي- اق كورمەدە الماتى قالاسى بويىنشا D3 تۋر ۇسىنىلادى، وندا قوناقتار مەن تۇرعىندار قالانىڭ تانىمال، مادەني، ماڭىزدى نىساندارىمەن تانىسا الادى. سونىمەن بىرگە، كورمەگە جۇزگە جۋىق فوتوسۋرەت پەن 32 ارحەولوگيالىق ەكسپونات قويىلعان. كورمە استاناداعى الماتىنىڭ مادەني كۇندەرى اياسىندا وتۋدە جانە 2016 -جىلعى 5 - جەلتوقسانعا دەيىن جالعاسادى.

 الماتىلىقتار ەلورداعا ءبىرقاتار مادەني شارالاردى دا دايىنداپ اكەلدى. 5 جانە 6 - قاراشادا الماتى قالاسى مادەنيەت جانە ارحيۆتەر باسقارماسىنا قاراستى مەملەكەتتىك قۋىرشاقتار تەاترى استانا قالاسىنىڭ ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ساحناسىندا «التىن ادام» ەپيكالىق سپەكتاكلىنىڭ قويىلىمىن، سونداي- اق «كۋكلى شوۋ» مەرەكەلىك سپەكتاكلىن ۇيىمداستىرادى. تەاتر فويەسىندە ەكى كۇن بويى تەاتر ۇيىمداستىرعان «قۋىرشاقتار كورمەسى» وتەدى.

 5 - قاراشا كۇنى ساعات 15.00-دە قازاقستان رەسپۋبليكاسىنىڭ ۇلتتىق كىتاپحاناسىندا استانا قالاسىنىڭ وقىرماندارىمەن تانىمال اقىنداردىڭ كەزدەسۋى وتەدى، وعان عالىم جايلىباي، مارالتاي ىبىرايەۆ، قاسىمحان بەگمانوۆ، جاناربەك ءاشىمجانوۆ جانە ت. ب. اقىندار قاتىسادى. ءدال وسى كۇنى ساعات 18.00-دە قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان، الماتى قالاسى اكىمىنىڭ ەسترادالىق- سيمفونيالىق وركەسترى مەن قازاقستان ەستراداسى جۇلدىزدارىنىڭ قاتىسۋىمەن «الماتى - تاۋەلسىزدىكتىڭ التىن بەسىگى» اتتى گالا- كونسەرت وتەدى.

 كونسەرتكە ايقىن تولەپبەرگەنوۆ، لۋينا، ديماش قۋدايبەرگەنوۆ، ديانا شاراپوۆا، ءالي وقاپوۆ، «مۇزارت»، «قوڭىر»، «كەشيۋ» «جىگىتتەر»، «سارىن» جانە «رينگو» توپتارى قاتىسادى. 6 - قاراشا كۇنى ساعات 15.00-دە بەيبىتشىلىك جانە كەلىسىم سارايىندا «سازگەن سازى» فولكلورلىق- ەتنوگرافيالىق ءانسامبلى مەن نۇرجان جانپەيىسوۆ، تالعات ءابۋعازى، ايگۇل قوسانوۆا، شولپان دارجانوۆا، ۇلجان بايبوسىنوۆا، تىلەۋلەس قۇرمانعاليەۆ سەكىلدى ءداستۇرلى ونەر وكىلدەرىنىڭ قاتىسۋىمەن «ماڭگىلىك مۇرات» اتتى ءداستۇرلى كونسەرتى وتەدى.