جۇكتى كەلىنشەككە ىشتەگى بالانى جارىپ الۋ جانە باستاعى ىسىكتى الىپ تاستاۋ وتالارى قاتار جاسالدى
استانا قالاسىندا 1988 -جىلعى كەلىنشەك جۇكتىلىك بويىنشا تۇرعىلىقتى مەكەنجايىندا دارىگەرلەردىڭ قاراۋىندا بولعان. قىركۇيەكتە جاعدايى ناشارلاپ، باسى اۋىرىپ، سول جاعىندا السىزدىك پايدا بولىپ دەرتى ۋشىعا تۇسكەن. 21 -قازاندا باس ميىنا كومپيۋتەرلىك توموگرافيا جاسالىپ، سول جاق سامايىندا كولەمدى ىسىك بارلىعى انىقتالدى. انا مەن بالا ۇلتتىق عىلىمي ورتالىعىنا جاتقىزىلىپ، ۇلتتىق نەيروحيرۋرگيا ورتالىعىنىڭ ماماندارىمەن بىرلەسىپ، قايتا تەكسەرىلدى. ميىنا ماگنيتتى- رەزونانستى توموگرافيا جاسالىپ، ىسىكتىڭ بارلىعى راستالدى. ناۋقاستىڭ جاعدايىنىڭ اۋىرلىعى ەسكەرىلە وتىرىپ، ول ۇلتتىق نەيروحيرۋرگيا ورتالىعىنا اۋىستىرىلادى. كونسيليۋم وتكىزىلىپ، ەكى وتانى قاتار جاساۋ جونىندە شەشىم قابىلداندى. ءسويتىپ، 26 -قازاندا ۇلتتىق نەيروحيرۋرگيا ورتالىعىنىڭ نەيروحيرۋرگتەرى مەن انا مەن بالا ۇلتتىق عىلىمي ورتالىعىنىڭ اكۋشەر-گينەكولوگ دارىگەرلەرى بىرلەسىپ، ميشىقتىڭ ىسىگى الىپ تاستادى جانە بالانى ىشتەن جارىپ الۋ وتاسىن اتقاردى. ەكى وپەراتسيا دا ءساتتى ءوتىپ، سالماعى 2260 گرامم، بويىنىڭ ۇزىندىعى 46 س م بولاتىن قىز بالا دۇنيەگە كەلدى. ءارى قاراي ءتيىستى كومەك كورسەتۋ ءۇشىن نارەستە انا مەن بالا ۇلتتىق عىلىمي ورتالىعىنىڭ نەوناتولوگيا بولىمىنە بىردەن اۋىستىرىلدى.
ال ايەلدىڭ جاعدايى وتادان كەيىن 7 كۇننەن سوڭ قالپىنا كەلىپ، ول دا انا مەن بالا ۇلتتىق عىلىمي ورتالىعىنا جەتكىزىلدى. وسىلايشا، ەلىمىزدىڭ ەكى ءىرى كلينيكاسى - ۇلتتىق نەيروحيرۋرگيا ورتالىعى مەن انا مەن بالا ۇلتتىق عىلىمي ورتالىعىنىڭ بىرلەسە اتقارعان جۇمىسىنىڭ ناتيجەسىندە امان قالىپ، نارەستەلى بولعان ايەل 7 -قاراشادا اۋرۋحانادان شىعارىلىپ، ۇيىنە قايتادى.
