20:49, 04 - قاراشا 2016 | GMT +5
توعىز كەلى الماز تاستاردى اكەتپەك بولعان رەسەيلىك ۇستالدى
استانا. قازاقپارات - رەسەي ازاماتى ەۋرازيالىق ەكونوميكالىق وداق (ە ا ە و) اۋماعىنا اكۆاريۋم ءۇشىن گراۆيا تۇرىندە توعىز كەلى الماز تاستاردى زاڭسىز اكەتپەك بولعان كەزىندە بەلورۋسسيادا ۇستالدى.
بۇل تۋرالى جۇما كۇنى، 4 -قاراشادا رەسپۋبليكانىڭ گرودنەنسك وڭىرلىك كەدەنىنىڭ سايتىندا حابارلاندى. رەسەيلىكتىڭ اۆتوموبيلىن پولشامەن شەكارادا ورنالاسقان «بەرەستوۆيتسا» وتكىزۋ بەكەتىندە توقتاتقان. جۇرگىزۋشىنىڭ جەكە زاتتارىنىڭ اراسىنان ءتىنتۋ كەزىندە «كەدەنشىلەر كۇدىگىن تۋعىزعان ءارتۇرلى پىشىندەگى، تۇستەر مەن ولشەمدەردەگى كريستالل تاستار» تابىلعان. ول بۇل تاستار اكۆاريۋمعا (سۋ جانۋارلارى مەن وسىمدىكتەرىن وسىرۋگە جانە زەرتتەۋگە ارنالعان شىنى ىدىس) ارنالعان دەپ سەندىرمەكشى بولدى، ءبىراق ساراپتاما ناتيجەسى بۇلاردىڭ سورتتالماعان الماز تاستار ەكەندىگىن كورسەتتى. الدىن الا باعالاۋ بويىنشا ولاردىڭ قۇنى 900 مىڭنان استام بەلارۋس رۋبلىن قۇرايدى. گرودنو قالاسىنىڭ سوتى ايىپپۇل سالۋدى جانە ول اكەتپەكشى بولعان الماز تاستاردى تاركىلەۋگە قاۋلى شىعاردى.
