دوپينگ داۋىنا ىلىككەن يليا يلين كەلەسى وليمپياداعا قاتىسۋى ابدەن مۇمكىن - مينيستر

استانا. قازاقپارات - وليمپيادانىڭ ەكى دۇركىن چەمپيونى يليا يلين ءوزىنىڭ جاڭا جۇمىس ورنى - ۇلتتىق جانە شتاتتىق كوماندالار ديرەكسياسىنىڭ كەڭەسشىسى قىزمەتىنە كىرىستى.

دەگەنمەن، ونىمەن يليانىڭ سپورتتىق مانسابى اياقتالمايدى، دەپ حابارلايدى قازاقپارات ءتىلشىسى.

«يليا ءيليننىڭ تاجىريبەسى وتە كوپ. ماسەلەن، حالىقارالىق ارەنالارعا شىققاندا ءبىزدىڭ سپورتشىلارىمىزعا پسيحولوگيالىق تۇرعىدا ۇلكەن دايىندىق كەرەك. يليانىڭ ءبىر كەرەمەتى، حالىقارالىق تاجىريبەسى ءوز الدىنا سپورتشىلارعا مورالدىق- پسيحولوگيالىق دايىندىق جاعىنان كوپ كومەك بەرە الادى. ول ءاربىر ءىسىن ۇلكەن دايىندىقپەن جاسايدى. ءوزى ءالى 28 دە. ءبىز قازىر حالىقارالىق وليمپيادا كوميتەتىنىڭ شەشىمىن كۇتىپ وتىرمىز. ەگەر جارىستان شەتتەتۋ تۋرالى جازا ەكى- ءۇش جىل بولسا، يليا كەلەسى توكيو وليمپياداسىنا قاتىسۋعا دايىن. ارينە، ءتورت جىلعا شەتتەتسە، وندا قيىنداۋ بولادى. ول كەزدە 32 گە كەلەدى. سوندا دا ءالى دە بولاشاعى بار عوي»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى قازاقپارات تىلشىسىنە بەرگەن سۇحباتىندا.

ايتا كەتەيىك، كۇنى كەشە يليا يلين ۇلتتىق جانە شتاتتىق كوماندالار ديرەكسياسىنىڭ كەڭەسشىسى قىزمەتىنە تاعايىندالعان بولاتىن. مينيسترمەن بولعان كەزدەسۋ كەزىندە ول حالىقارالىق وليمپيادا كوميتەتىنەن وزىنە قاتىستى رەسمي حاتتىڭ كەلمەگەنىن راستادى. «مەملەكەت باسشىسىنا مىڭ العىس ايتامىز. شىنى كەرەك، بارلىق سپورتشىلار ءۇشىن ول ۇلكەن سوققى بولدى. ماعان قاتىستى رەسمي حات ءالى كەلگەن جوق. دەگەنمەن، مەملەكەتتىڭ وسىنداي قامقورلىق جاساپ جاتقانى قۋانتادى. مۇمكىندىك بولسا، نۇرسۇلتان ءابىش ۇلىنا مەنىڭ اتىمنان العىس ايتىڭىزشى. مەنى سۇراسا، ءبارى دۇرىس، امان-ەسەنمىن دەڭىز»، - دەپ اتاپ ءوتتى ي. يلين.