قازاقستان رەسەيگە تۇز ەكسپورتىن ۇلعايتپاق

استانا. قازاقپارات - قازاقستان رەسەيگە تۇز ەكسپورتىن ارتتىرماق. وعان رەسەي فەدەراتسياسىنىڭ ەۋرووداق ەلدەرى مەن ا ق ش جانە ۋكراينادان تۇز تاسىمالداۋدى توقتاتۋى سەبەپ.

 سوندىقتان وتاندىق ساراپشىلار تۇز ەكسپورتىن ەسەلەۋدە سىر وڭىرىندەگى «ارال تۇز» زاۋىتىنىڭ الەۋەتىن جوعارى باعالاپ وتىر.

ايتا كەتكەن ءجون، ارال ماڭىنداعى ءوندىرىس 90 جىل بۇرىن باستالعان بولاتىن. سوڭعى جىلدارى كاسىپورىن قايتا جاڭعىرتۋدان ءوتىپ، سوڭعى تەحنولوگيالارمەن جابدىقتالدى. ناتيجەسىندە جىلدىق ءوندىرىس كولەمى 400 تونناعا جەتتى. بۇگىندە  قىزىلوردانىڭ تۇزى ىشكى نارىقتان بولەك، ىرگەلەس رەسەي مەن قىرعىزستانعا دا ساتىلىپ جاتىر.

مالىك تۇرمانوۆ، وبلىستىق ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى:

 - وبلىستىق ستاتيستيكا باسقارماسىنىڭ مالىمەتى بويىنشا بيىلعى جىلدىڭ 8 ايىندا ءبىزدىڭ وڭىردەن رەسەيگە ەكسپورتتالعان تۇز كولەمى وتكەن جىلعى كولەمنەن 26 پايىزعا ارتقان. ءبىزدىڭ ارالدىڭ تۇزى قازىردە رەسەي نارىعىنىڭ 10 پايىزىن ەڭسەردى.

قازىباي قۇدايبەرگەنوۆ، ەكونوميكا عىلىمدارىنىڭ كانديداتى:

- ارالدىڭ ماڭايىنداعى تۇزدىڭ قورى شەكسىز دەپ تە ايتۋعا بولادى. ويتكەنى تابيعات ءبارىن كەلتىرىپ جاتىر، اشىق وندىرىلەدى تۇز. سوندىقتان ءسوز جوق، ەگەر رەسەي امەريكا، ۋكراينادان جانە ەۋرووداقتان تۇز الۋدى توقتاتقان جاعدايدا، ءبىزدىڭ تۇزىمىزعا دەگەن سۇرانىس ارتادى. ال ەندى نارىق جاعدايىندا باعانى سۇرانىس پەن ۇسىنىس انىقتايدى عوي. وسىنداي جاعدايدا ءبىزدىڭ تۇز ءوندىرىسىن، سوسىن ارالدىڭ ماڭايىنداعى باسقا كالتسيلەنگەن سودا، تاعى كوپتەگەن دۇنيەلەر بار وندا، سولاردىڭ بارلىعىنىڭ ءوندىرىس قارقىنىن جەدەلدەتۋگە مۇمكىندىك بەرەدى دەگەن ءسوز.

www.24.kz