قازاقتىڭ اسىل تۇقىمدى جىلقىلارى قىتايعا تاسىمالدانادى

استانا. قازاقپارات - ق ر اۋىل شارۋاشىلىعىنىڭ مينيسترلىگى ۆەتەرينارلىق باقىلاۋ كوميتەتى ءتوراعاسىنىڭ ورىنباسارى ولجاس اۋسابايەۆتىڭ ايتۋىنشا، بۇگىندە وسى ماسەلەگە قاتىستى ەكىجاقتى حاتتاما راسىمدەلدى.

ۆەتەرينارلىق كۋالىكتى الۋ عانا قالدى، دەپ حابارلايدى قازاقپارات ءتىلشىسى.

 «ءبىز جىلقى تەكتەس جانۋارلاردى تاسىمالداۋ بويىنشا ارنايى حاتتامانى راسىمدەدىك. وندا قىتاي جاعى ءوز تالاپتارىن كورسەتتى. جىلقىنى جەتكىزۋ كەزىندە ءبىز سول تالاپتاردىڭ بارلىعىن ساقتاۋىمىز قاجەت. حاتتاما بار. ەندى، ۆەتەرينارلىق كۋالىكتى الۋ قاجەت. وسىدان كەيىن ءبىز ءوز جىلقىلارىمىزدى قىتاي ەلىنە تاسىمالداۋعا كىرىسەمىز. اسىرەسە، شىعىس قازاقستان مەن الماتى وبلىستارى ءبىزدىڭ اسىل تۇقىمدى جىلقىلارىمىزدى كورشى ەلدىڭ نارىعىنا جەتكىزۋگە مۇددەلى بولىپ وتىر»، - دەپ اتاپ كورسەتتى و. اۋسابايەۆ.

ونىڭ ايتۋىنشا، بۇگىندە قىتاي نارىعىنا قازاقستاندىق بالىق ونىمدەرىن تاسىمالداۋ كولەمى دە ارتىپ وتىر. اتالعان جۇمىسپەن 24 وتاندىق كاسىپورىن اينالىسىپ كەلەدى. بۇدان بولەك، سيىر مەن قوي ەتىن ەكسپورتتاۋ بويىنشا قىتاي جاعىنان ءبىرقاتار شەكتەۋلەر بار. وسى سالادا ءتيىستى شارالار قولعا الىندى. قازىرگى كەزدە قىتايلىقتار ءوز ساراپتاماسىن وتكىزىپ جاتىر.

اۆتور: ارمان اسقاروۆ