قازاقستان مەن رەسەيدىڭ شەكارا قىزمەتىنىڭ باسشىلارى كەزدەستى
باسپا ءسوز مالىمەتتەرىنە قاراعاندا، قازاقستان رەسپۋبليكاسى مەن رەسەي فەدەراتسياسى شەكارا ۆەدومستۆولارىنىڭ باسشىلارى سەنىمدى ءارى تۇراقتى تۇردە دامىپ كەلە جاتقان ەكىجاقتى شەكارالىق ىنتىماقتاستىققا كوڭىل توياتىندىعىن اتاپ ءوتتى.
كۇن ءتارتىبى بويىنشا قازاقستان - رەسەي اراسىنداعى شەكارانى كەلىسىممەن كۇزەتۋگە كوشۋدىڭ، سونداي-اق جەدەل-ىزدەستىرۋ قىزمەتى اياسىنداعى ىنتىماقتاستىقتىڭ ماڭىزدى ماسەلەلەرى قارالدى. سونىمەن قاتار تاراپتار باقىلاۋ-وتكىزۋ بەكەتتەرىندەگى جاعدايدى، بىرىككەن شەكارالىق باقىلاۋ تۋرالى شەشىمدى جۇزەگە اسىرۋدىڭ جاي-جاپسارىن تالقىلادى.
قازاقستان مەن رەسەيدىڭ شەكاراشىلارىنىڭ كاسپي ايماعىنداعى ءوزارا ىنتىماقتاستىق قارىم-قاتىناسىن تالقىلاۋ دا نازاردان تىس قالمادى. گەنەرال-مايور دارحان ءدىلمانوۆ پەن ارميا گەنەرالى ۆلاديمير كۋليشوۆ كەزدەسۋدى قورىتىندىلاي كەلە بۇل شارانىڭ ەكى جاققا دا وتە پايدالى بولعاندىعىن، الداعى كەزدە ەكى مەملەكەتتىڭ شەكارا ۆەدومستۆولارىنىڭ ىنتىماقتاستىق قارىم-قاتىناسىنا جاڭاشا سەرپىن بەرەتىندىگىن اتاپ ءوتتى.
