سىرتقى ىستەر مينيسترلىگى مەككەگە قاراي زىمىران جىبەرگەن كوتەرىلىسشى-حۋسيلەردى ايىپتادى
«ساۋد تاراپىنىڭ رەسمي اقپاراتىنا سايكەس، 2016-جىلعى 27- قازاندا يەمەندەگى كوتەرىلىسشى- حۋسيلەر مەككەگە قاراي زىمىران جىبەردى. قازاقستان رەسپۋبليكاسىنىڭ سىرتقى ىستەر مينيسترلىگى كوتەرىلىسشىلەردىڭ بۇل ارەكەتىن ايىپتايدى. مەككە جانە مەدينە جىل سايىن ميلليونداعان قاجى، ونىڭ ىشىندە مىڭداعان قازاقستاندىقتار قۇلشىلىق جاساۋ ءۇشىن زيارات ەتەتىن قاسيەتتى مەكەن بولىپ تابىلادى. بۇل كوزقاراس بويىنشا مۇنداي ارەكەت وركەنيەتتىك، جالپى ادامزاتتىق جانە ىزگىلىك تۇرعىسىنان العاندا مۇلدەم قولايسىز بولىپ تابىلادى»، - دەلىنگەن س ءى م مالىمدەمەسىندە.
سونداي-اق، قازاقستاننىڭ سىرتقى ساياسات ۆەدومستۆوسى مۇنداي جاۋاپسىز قۇيتىرقى ارەكەتتەر يەمەندەگى داعدارىستى شەشۋگە سەپتىگىن تيگىزبەيتىنىن، قاقتىعىستى ساياسي رەتتەۋ كەلەشەگىن الىستاتا تۇسەتىنىن العا تارتادى. «قازاقستان يەمەندەگى اسكەري ارەكەتتەردىڭ ءارى قاراي ءورشۋىنىڭ قولايسىزدىعى تۋرالى ءوزىنىڭ قاعيداتتى ۇستانىمىنا بەرىك ەكەندىگىن راستايدى جانە وسى داعدارىستى رەتتەۋدىڭ جالعىز دۇرىس جولى ساياسي شەشىم بولاتىندىعىن جاقتايدى. وسىعان بايلانىستى ب ۇ ۇ ارنايى وكىلى يسمايل ۋلد اش-شەيح پەن ءوڭىر ەلدەرىنىڭ پرەزيدەنت ابد راببو مانسۋر حاديدىڭ اكىمشىلىگى جانە حۋسي قوزعالىسىنىڭ وكىلدەرى اراسىنداعى تىكەلەي كەلىسسوزدەردى جانداندىرۋ بويىنشا كۇش-جىگەرلەرىنە قولداۋ بىلدىرەمىز»، - دەلىنگەن مالىمدەمەدە.
اۆتور: قانات مامەتقازى ۇلى
