مادەنيەت قايراتكەرلەرى تۇڭعىشباي جامانقۇلوۆتىڭ ۇستالۋىنا قاتىستى پىكىر ءبىلدىردى
ايتا كەتەيىك، قازاقستاننىڭ حالىق ءارتىسى تۇڭعىشباي جامانقۇلوۆ كەشە، 2- قاراشادا ۇستالعان بولاتىن. ول «فەنيكس» كوركەم فيلمىنىڭ ءتۇسىرىلىم جۇمىستارىنا بولىنگەن قاراجاتتى جىمقىردى دەپ ايىپتالىپ جاتىر.
رەجيسسەر تالعات تەمەنوۆ جامانقۇلوۆپەن بىرلەسىپ جۇمىس ىستەگەن كەزىن ەسكە الدى. «وتە وكىنىشتى. تۇڭعىشباي وتە جاقسى اكتەر. ونىڭ «قان مەن تەردەن» باستالاتىن فيلمدەرىنىڭ بارلىعى ەسىمدە. «بولتىرىك بورىك استىندا» تۋىندىسىندا ءازىربايجان مامەتوۆتى سومداعان العاشقى رولدەرىنەن بەرى بىلەمىن. «ول مەن تۇسىرگەن «كوشپەندىلەر» فيلمىندە باستى رولدەردىڭ بىرىندە وينادى. ول وتە قابىلەتتى ادام، سوندىقتان وكىنىش بىلدىرەمىن. ارينە، ماسەلەنىڭ ءمان-جايىن سوت پەن تەرگەۋ انىقتايدى»، - دەدى ول.
سونىمەن قاتار، تەمەنوۆ جامانقۇلوۆتىڭ ۇستالۋىن تۇسىنبەۋشىلىك نەمەسە جالا دەپ قابىلدايتىنىن جەتكىزدى. «سەبەبى ول اكتەر، ءارتىس جانە ءىستىڭ قارجىلاي تۇستارىن تۇسىنبەيتىن شىعار. تۇسىنسە دە، دۇرىس تۇسىنبەيدى. پروديۋسەر بولۋ - مۇلدەم باسقا ماماندىق. ونىڭ ماماندىعى رەجيسسەر دە ەمەس، رەجيسسۋرانى بىتىرگەن جوق. ماسەلەن، مەن رەجيسسەرمىن - مەن ەشقاشان بالەت قويمايمىن، سەبەبى بۇل ىستە بىلەتىنىم از. مۇندا قاتەلىك بولسا، تۇڭعىشباي بىلمەستىكتەن جاسادى»، - دەدى ول.
تەمەنوۆ جامانقۇلوۆ جۇمىسىنا ورالادى دەپ ۇمىتتەنەدى. «ونىڭ تەزىرەك وتباسىنا، جۇمىس ۇجىمىنا ورالعانىن قالايمىن. ۇيىمداستىرۋشىلىق قاسيەتتەرى ناشار شىعار. ءبىراق ول وتە قابىلەتتى اكتەر، دارىندى. دارىنى بار، داۋسى بار. ءاندى دە تاماشا ايتادى. ول يگى ىستەرمەن اينالىسۋى كەرەك. جاسامپاز تۇلعالار بار، جوياتىن تۇلعالار بار. ول - جاسامپاز تۇلعا. بۇدان ءبىز دە، ءوزى دە، كورەرمەن دە ۇتپاسا، ۇتىلمايدى»، - دەدى تەمەنوۆ.
ال ءوز كەزەگىندە تاعى ءبىر رەجيسسەر ەرمەك تۇرسىنوۆ بۇل وقيعانىڭ جاعىمسىز ەكەنىن اتادى. «حالىق ءارتىسى، ەڭبەك سىڭىرگەن ادام. ءبىر جاعىنان، قازىر شەشىم شىعارۋعا ءالى ەرتە. تەرگەۋ ءوز جۇمىسىن قورىتىندىلاسىن، سوندا تۇسىنەمىز. قازىر دىم دا تۇسىنىكسىز. ارينە، جاعىمسىز وقيعا، ەندى نە بولارى بەلگىسىز. دالەلدەپ كورسىن. تۇسىنىكسىز وقيعا. وتىرىپ الىپ، بولجاعىم دا كەلمەيدى. مۇنىڭ جاعىمسىز وقيعا ەكەنىن عانا ايتا الامىن»، - دەدى ول.
ال جامانقۇلوۆتىڭ ارىپتەسى، اۋەزوۆ اتىنداعى تەاتردىڭ اكتەرى بەكجان تۇرىس ءوز كەزەگىندە بۇل وقيعاعا قاتىستى پىكىر بىلدىرە وتىرىپ، تۇڭعىشباي جامانقۇلوۆتىڭ ادامگەرشىلىك قاسيەتتەرىن ايتتى. «ول وتە جاقسى اكتەر، جاقسى ادام. حالىق ءارتىسى اتاعىن بوسقا بەرەتىن بە ەدى»، - دەدى ول.
ايتا كەتەيىك، مۇنىڭ الدىندا مادەنيەت جانە سپورت ءمينيسترى ارىستانبەك مۇحامەدي ۇلى تۇڭعىشباي جامانقۇلوۆتىڭ ۇستالۋىنا قاتىستى پىكىر بىلدىرگەن بولاتىن. ءمينيستردىڭ ايتۋىنشا، تۇڭعىشباي جامانقۇلوۆ كەشىرىم سۇراۋ ءۇشىن ارنايى استاناعا كەلگەن. «ءبىر اپتا بۇرىن ول ارنايى كەلىپ، كەشىرىم سۇرادى. ىسىنە وكىنەتىنىن ايتتى. ارينە، بۇل ماسەلە وڭاي ەمەس. ۇزاق ويلاندىم. مەن وعان كومەك كورسەتۋگە دايىنمىن (...). كەپىل بەرۋگە دە دايىنمىن»، - دەدى مادەنيەت جانە سپورت ءمينيسترى ارىستانبەك مۇحامەدي ۇلى.
ەسكە سالايىق، وسىعان دەيىن قازاقستاندىق اكتەردىڭ ۇستالعانى حابارلانعان ەدى. سىبايلاس جەمقورلىققا قارسى ءىس-قيمىل ۇلتتىق بيۋروسى «فەنيكس» كوركەم فيلمىنىڭ تۇسىرىلىمدەرىنە بولىنگەن قاراجاتتىڭ جىمقىرىلعانىن انىقتاعان بولاتىن.
