تاسماعامبەتوۆ ءبىرقاتار مەملەكەتتىك فۋنكتسيالاردى بيزنەسكە بەرۋ تۋرالى شەشىم قابىلدادى
وتىرىس بارىسىندا كوميسسيا مۇشەلەرى جەرگىلىكتى ءوزىن-ءوزى باسقارۋ جانە ءوزىن-ءوزى رەتتەۋدى دامىتۋ ارقىلى ازاماتتاردىڭ شەشىم قابىلداۋ ۇردىسىنە قاتىسۋ مۇمكىندىگىن كەڭەيتۋ تۋرالى ماسەلەنى قارادى.
ەسكە سالا كەتسەك، كەيبىر مەملەكەتتىك فۋنكتسيالاردى باسەكەلەستىك ورتاعا بەرۋ ماسەلەسى قازاقستان رەسپۋبليكاسىنىڭ پرەزيدەنتى ن. نازاربايەۆتىڭ باستاماسىمەن جۇرگىزىلىپ وتىرعان «100 ناقتى قادام» ۇلت جوسپارىنىڭ 97- قادامىندا كورسەتىلگەن.
ونى جۇزەگە اسىرۋ ءۇشىن اعىمداعى جىلدىڭ قاڭتار ايىندا ارنايى كوميسسيا قۇرىلعان ەدى. جالپى، اتالعان شارالاردى ورىنداۋ مەملەكەتتىك فۋنكتسيالاردى قىسقارتۋعا، ازاماتتاردىڭ شەشىم قابىلداۋ ۇردىسىنە قاتىسۋىن كەڭەيتۋگە، جەرگىلىكتى ءوزىن-ءوزى باسقارۋ جانە ءوزىن-ءوزى رەتتەۋدى دامىتۋعا، سونىمەن قاتار، مەملەكەتتىڭ شىعىندارىن ازايتۋعا باعىتتالعان.
كوميسسيانىڭ جۇمىسشى ورگانى - ۇلتتىق ەكونوميكا مينيسترلىگى تاراپىنان مەملەكەتتىك ورگانداردىڭ ءوز فۋنكتسيالارىن ينۆەنتاريزاتسيالاۋدى جۇرگىزۋى ءۇشىن پاسپورت ازىرلەندى. اتقارىلعان جۇمىستاردىڭ ناتيجەسىندە ورتالىق اتقارۋشى ورگاندارمەن جۇزەگە اسىرىلاتىن فۋنكتسيالاردىڭ جالپى سانى 4614 ءتى قۇرادى. سونىمەن قاتار، بۇعان دەيىن كوميسسيا جانىندا قۇرىلعان ساراپتاما توبىنا بازالىق زاڭ جوباسىن ازىرلەۋ اياسىندا مەملەكەتتىك ورگانداردىڭ «ۋاقىتشا» جانە «سايكەس ەمەس» فۋنكتسيالارى تۇسىنىگىن ەسكەرۋ تاپسىرىلدى.
ازاماتتىق قوعام جانە جەكە كاسىپكەرلىك سۋبەكتىلەرىنىڭ باستاماسىنا جانە نارىقتىڭ دايىندىعىنا وراي، سونداي-اق، «ءوزىن-ءوزى رەتتەۋ تۋرالى» زاڭ نورمالارىنىڭ تالاپتارىنا وراي فۋنكتسيالار تىزبەسى ەكى توپقا ءبولىندى.
ءبىرىنشىسى 2016-2017-جىلداردى، ەكىنشىسى 2017-2019-جىلداردى قامتيدى. سونداي-اق، ۆەدومستۆوارالىق ءىس-قيمىلدى تولىق جۇزەگە اسىرۋ ءۇشىن ورتالىق اتقارۋشى ورگانداردىڭ جۇمىس توبى جەتەكشىلەرىنىڭ ارالىق ەسەپتى ۇسىنۋ كەستەسى دايىندالدى. «ساراپتاما توبى، «اتامەكەن» ۇلتتىق كاسىپكەرلەر پالاتاسى مۇددەلى مەملەكەتتىك ورگاندارمەن بىرلەسىپ باسەكەلەستىك ورتاعا جانە ءوزىن-ءوزى رەتتەۋ ۇيىمدارىنا بەرۋگە ۇسىنىلعان مەملەكەتتىك ورگاندار فۋنكتسيالارىنىڭ ەكىنشى توبىن قاراۋ جۇمىسىنا كىرىسۋى قاجەت» - دەپ يمانعالي تاسماعامبەتوۆ كوميسسيا وتىرىسىن قورىتىندىلادى.
تالقىلاۋ قورىتىندىسى بويىنشا كوميسسيا مۇشەلەرى باسەكەلەستىك ورتاعا ءبىرقاتار قىزمەتتەردى بەرۋدى شەشتى. اتاپ ايتقاندا، ادىلەت مينيسترلىگىنەن - باعالاۋ قىزمەتىن رەتتەۋ فۋنكتسياسىن، ەنەرگەتيكا مينيسترلىگىنەن - ەكولوگيالىق اۋديتورلاردى رەتتەۋ قىزمەتىن، دەنساۋلىق ساقتاۋ جانە الەۋمەتتىك دامۋ مينيسترلىگىنەن - مەديتسينالىق كومەك كورسەتۋ ساپاسى مەن دەڭگەيىنە ازاماتتاردىڭ قاناعاتتانۋ دارەجەسىن انىقتاۋ بويىنشا فۋنكتسياسىن بەرۋ شەشىلدى.
باسەكەلەستىك ورتاعا جانە ءوزىن-ءوزى رەتتەۋ ۇيىمدارىنا بەرۋگە نارىقتىڭ دايىندىعىن تالداۋ جۇرگىزۋ جۇمىسىنىڭ قورىتىندىسى بويىنشا كوميسسيانىڭ كەزەكتى وتىرىسىن وتكىزۋ 2017-جىلدىڭ قاڭتار ايىنا بەلگىلەندى.
