باي مۇراگەر ايەل قالاي بەيشارا كۇيگە ءتۇستى - فوتو
63 جاستاعى مارياننا ءبىر كەزدەرى جوعارى تاپ وكىلى، مانحەتتەندەگى بەدەلدى بيزنەسمەننىڭ نەمەرەسى رەتىندە تانىلعان.
بۇل تۋرالى Daily Mail حابارلايدى.
ول بالەت مەكتەبىن اياقتاعان. الايدا اناسىنىڭ ولىمىنەن سوڭ ءومىرى كۇرت وزگەرىپ، تاعدىر جولى اۋىرلاپ كەتكەن. ولار زاتتارىن قوقىس پاكەتتەرىنە ساقتاپ، وزدەرى پورولوندى ماتراتس توسەنىپ جاتادى.
ونىڭ وتباسى اۋماعى 370 شارشى مەتر بولاتىن ۇلكەن ۇيدە تۇرعان. قازىر بۇل پاتەردىڭ قۇنى 10 ميلليون دوللار. الايدا اناسى قايتىس بولعاننان كەيىن ول ءبارىن نەبارى 3 ميلليون دوللارعا ساتۋعا ءماجبۇر بولادى. اقشانى اپكەسى دجوردجيا ەكەۋى جۇمساعان.
1950-60-جىلدارعا سايكەس كەلگەن بالالىق شاعىنان جاعىمدى ەستەلىكتەر قالماعان. ونىڭ اناسى دەپرەسسيامەن اۋىرىپ، كەيدە ادام تۇسىنىكسىز شۋلى ارەكەتتەر جاسايدى ەكەن.
1971-جىلى مارياننا بالەت مەكتەبىن ءتامامداعاننان كەيىن اتاسى قايتىس بولادى. بۇدان كەيىن اناسى وتباسىلىق ءىرى بيزنەستى بىرنەشە ميلليونعا عانا ساۋدالاي سالعان.
سول كەزدە مارياننا تۋعان ۇيىنەن كەتىپ قالادى. ول بوستون ۋنيۆەرسيتەتىن ءبىتىرىپ، مەدبيكە بولىپ جۇمىس ىستەپ كۇيەۋگە شىعادى. جيزەل ەسىمدى قىزى ومىرگە كەلەدى. ءبىراق 30 جىلداي ۋاقىت بۇرىن ف ب ر قاتارىندا جۇمىس ىستەيتىن كۇيەۋى جۇمىس بويىنشا نيۋ-يورككە كەتۋگە ءماجبۇر بولادى. ولار مارياننا تۋعان اۋدانعا قايتا ورالعاننان كەيىن كوپ ۇزاماي اجىراسىپ كەتەدى. بۇرىنعى كۇيەۋى فلوريداعا كەتىپ، جيزەلدى دە وزىمەن بىرگە الىپ كەتەدى.
مارياننا قىزىنىڭ ءۇش جاسىنان بەرى ونى ءالى كورگەن ەمەس. ول بالالاردى كورگەن سايىن قىزىن ەسىنە الىپ، جۇرەگى اۋىرادى. بۇل تاقىرىپتا سويلەسۋگە دە قۇشتار ەمەس.
مارياننانىڭ بالا كەزدە تۇرعان ءۇيى
ول اۋىر جاعدايلاردى كوتەرە الماي ەسىرتكىگە وتىرىپ، ءتىپتى اپتاسىنا ءتورت رەت قابىلدايتىن تاۋەلدىلىككە جەتەدى. اناسىنىڭ ولىمىنەن سوڭ اپكەسىمەن بىرگە مۇراگەرلىككە قالعان اقشانى ءبولىپ الىپ، قازىرگى كۇيەۋى فرەنكپەن تانىسادى. ول 59 جاستاعى قۇرىلىسشى ەكەن. ولار 2000-جىلى ۇيلەنىپ، لونگ-ايلەندتەن ءۇي ساتىپ الادى. الايدا قارجىلىق داعدارىس كەزىندە باسپانالارىنان قايتادان ايىرىلىپ قالعان.
«ءبىز انامىزدىڭ اقشاسىن قالاي بولسا سولاي جۇمسادىق» دەيدى مارياننا. اقىرى ەرلى-زايىپتىلار وزدەرى تانىسقان قۇربىسى دوننا ەلتينگەردىڭ ۇيىنە كەلىپ تۇراقتايدى. ول راكتىڭ جەڭىل تۇرىمەن اۋىرادى ەكەن. مارياننا مەن ارەنك ونى كۇتىپ-باپتايدى. دوننا ءۇش جىل بۇرىن قايتىس بولعان، ال ەرلى-زايىپتىلاردى تامىز ايىندا پاتەردەن شىعارىپ جىبەرگەن.
ولاردىڭ جاعدايىمەن تانىسىپ، ءىستى قولىنا العان ادۆوكات قالا بيلىگى ولاردى باسپانامەن قامتاماسىز ەتۋدە كومەكتەسەدى دەپ ۇمىتتەنەدى.
