باقىتبەك ەسەنتايەۆ: مەن كىنالى ەمەسپىن

تالدىقورعان. قازاقپارات - بۇگىن باقىتبەك ەسەنتايەۆ سوتتا سوڭعى ءسوزىن سويلەدى. ول ءوز سوزىندە كىنالى ەمەس ەكەندىگىن جەتكىزدى، دەپ حابارلايدى قازاقپارات ءتىلشىسى.

«باقىتبەك ەسەنتايەۆ سوتتا سويلەگەن سوڭعى سوزىندە ءوزىنىڭ كىنالى ەمەس ەكەندىگىن جەتكىزدى. ول باياندى ولتىرۋگە وقتالماعاندىعى جونىندە ايتتى»، - دەيدى ەسەنتايەۆتىڭ قورعاۋشىسى.

«سوت ونىڭ ءسوزىن ەسكەرمەدى. كەرىسىنشە ونى ادام ولتىرۋگە وقتالدى دەپ تانىدى. ولاي ەمەس. باقىتبەك تەك دەنە جاراقاتتارىن سالدى» دەيدى، قورعاۋشى. قازىر قورعاۋشىلار «باقىتبەك ەسەنتايەۆقا تاعىلعان ايىپپەن كەلىسپەيمىز» دەپ وتىر. ەندى ولار اپپەلياتسيالىق شاعىم تۇسىرمەك. باقىتبەك ەسەنتايەۆ زورلاۋ، زورلىق-زومبىلىق باپتارى بويىنشا اقتالىپ شىقتى. ال ادام ولتىرۋگە وقتالۋ بابى بويىنشا كىنالى دەپ تانىلىپ 9 جىلعا باس بوستاندىعىنان ايىرىلدى.

ءبىراق، سوڭعى سوت وتىرىسىنا باقىتبەك ەسەنتايەۆتىڭ قىزدارى دا. بايان ماقسات قىزى دا كەلمەدى.

ايتا كەتۋ كەرەك، باقىتبەك ەسەنتايەۆتىڭ سوتى 18 -قازاندا باستالدى. ءىس الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالدى. ەستەرىڭىزگە سالا كەتەيىك، بايان ماقسات قىزى بيىل 10 -ماۋسىمدا بىرنەشە جەردەن پىشاقتالىپ، اۋىر جاراقاتپەن تالعار اۋدانىنداعى اۋرۋحاناعا تۇسكەن بولاتىن.

بەلگىلى پروديۋسەر، ەكى بالانىڭ اناسى بايان ماقسات قىزىن ءوزىنىڭ كۇيەۋى ولتىرمەك بولدى دەگەن كۇدىكپەن باقىتبەك ەسەنتايەۆ ۇستالىپ، قاماۋعا الىندى. سونداي-اق قازىرگى تاڭدا تانىمال پروديۋسەر الەۋمەتتىك جەلىدەگى پاراقشالارىندا اتىن بايان ماقسات قىزى دەپ وزگەرتكەن.