ساعىنتايەۆ شاڭحاي ىنتىماقتاستىق ۇيىمى ەركىن ساۋدا ايماعى-كەلەشەگى بار ءوزارا ءتيىمدى جوبا

بىشكەك. قازاقپارات - شاڭحاي ىنتىماقتاستىق ۇيىمىنىڭ ەركىن ساۋدا ايماعى - كەلەشەگى بار ءوزارا ءتيىمدى جوبا.

ش ى ۇ مۇشە مەملەكەتتەرىنىڭ ۇكىمەت باسشىلارى كەڭەسىنىڭ 15- مەرەيتويلىق وتىرىسىندا قازاقستان پرەمەر-ءمينيسترى باقىتجان ساعىنتايەۆ وسىنداي پىكىر ءبىلدىردى، دەپ حابارلايدى قازاقپاراتتىڭ بىشكەكتەگى مەنشىكتى ءتىلشىسى.

«15 جىلدا ش ى ۇ جۇمىسىندا ەلەۋلى ناتيجەلەرگە قول جەتكىزدىك. ش ى ۇ ەركىن ساۋدا ايماعى - كەلەشەگى بار ءوزارا ءتيىمدى جوبا بولار ەدى. ىشكى ەكونوميكالىق بايلانىستاردى كەڭەيتۋ مەن ايماقتىق ەكونوميكالىق ءوزارا قارىم-قاتىناستى نىعايتۋدى ەسەپكە الىپ، ۇيىمعا مۇشە مەملەكەتتەردىڭ، باقىلاۋشى مەملەكەتتەردىڭ جانە ديالوگ بويىنشا سەرىكتەستەردىڭ ءوزارا مۇددەلەرىن ۇيلەستىرە وتىرىپ، بۇل باعىتتاعى جۇمىستاردى جالعاستىرۋ كەرەك»، دەپ اتاپ ءوتتى ب. ساعىنتايەۆ. ەسكە سالا كەتسەك، بۇگىن بىشكەكتە شاڭحاي ىنتىماقتاستىق ۇيىمىنا مۇشە مەملەكەتتەر ۇكىمەتتەرىنىڭ باسشىلار كەڭەسىنىڭ 15- مەرەيتويلىق وتىرىسى ءوتىپ جاتىر. بۇل وتىرىس ش ى ۇ مەرەيتويلىق جىلىنداعى رەسمي شارالار كەزەڭىن اياقتايدى. بۇگىندە قازاقستان ش ى ۇ ءتوراعاسى بولىپ تابىلادى، ال 2017-جىلدىڭ 8-9- ماۋسىمىندا استانادا ۇيىمعا مۇشە مەملەكەتتەر باسشىلارىنىڭ سامميتى وتەدى.