مادەنيەت ءمينيسترى تۇڭعىشبايدى بۇگىن بوساتۋعا اتسالىساتىنىن ۋادە ەتتى - سايروۆ

استانا. قازاقپارات - بۇگىن ساياساتتانۋشى ەرلان سايروۆ ءوزىنىڭ الەۋمەتتىك پاراقشاسىندا ءبىر توپ جولداستارىمەن مادەنيەت جانە سپورت ءمينيسترى ارىستانبەك مۇحامەدي ۇلىنىڭ جەكە قابىلداۋىندا بولعانىن ايتىپ، كۇنى كەشە قىرۋار قاراجاتتى ۇرلادى دەگەن كۇدىكپەن ۇستالعان تۇڭعىشباي جامانقۇلوۆتى بوساتۋعا كومەك سۇراعانىن جازعان بولاتىن.

قازاقپارات تىلشىسىنە سۇحبات بەرگەن ەرلان سايروۆ اتالعان اقپاراتتى راستادى. ونىڭ ايتۋىنشا، ءمينيستردىڭ ءوزى بۇل ماسەلەنى جەكە باقىلاۋىنا الىپ، بۇگىن تۇسكە دەيىن ت. جامانقۇلوۆتى بوساتۋعا مەيلىنشە كومەك كورسەتەتىنىن جەتكىزگەن. «ءبىز جاڭا عانا مينيسترگە كىرىپ شىقتىق. بۇل ماسەلەنىڭ حالىقتىڭ اراسىندا كەڭىنەن كوتەرىلىپ جاتقانىن، قوعامنىڭ پىكىرى وزگەرىپ بارا جاتقانىن دا ايتتىق. ەندى، تۇڭعىشباي - قازاقتىڭ ۇلكەن بەتكە ۇستار ازاماتتارىنىڭ ءبىرى. سوندىقتان وعان اراشا ءتۇسۋ كەرەك. ءمينيستردىڭ ءوزى اينالىسىپ جاتىر ەكەن. سوسىن ول ايتتى، بۇل ماسەلەمەن جەكە اينالىسىپ جاتىرمىن دەپ. بۇگىن تۇسكە دەيىن شىعىپ قالۋى كەرەك دەدى»، - دەپ اتاپ ءوتتى ەرلان سايروۆ.

ساياسات تانۋشىنىڭ سوزىنە قاراعاندا، تۇڭعىشباي جامانقۇلوۆتى بوساتۋ ماسەلەسى جالعىز ءمينيستردىڭ قولىندا تۇرعان شارۋا ەمەس. دەگەنمەن، پروتسەسسۋالدىق شارالاردان كەيىن ونى بوساتۋى ابدەن مۇمكىن.