قىتايدان رەسەيگە تاۋار جەتكىزۋ ءۇشىن ءىرى كونتراباندالىق ارنا قۇرعان شەنەۋنىكتەر ۇستالدى
بۇل تۋرالى ق ر باس پروكۋراتۋراسىندا وتكەن بريفينگتە ۆەدومستۆونىڭ اپپارات باسشىسىنىڭ ورىنباسارى ءنۇردىلدا وراز ءمالىم ەتتى، دەپ حابارلايدى قازاقپارات. «بيىلعى جىلدىڭ 31 -قازانىندا باس پروكۋراتۋرانىڭ جەتەكشىلىگىمەن تەرگەلىپ جاتقان ءىس بويىنشا 3 كۇدىكتى ۇستالدى. ولاردىڭ ەكەۋى قارجى مينيسترلىگى كەدەندىك باقىلاۋ كوميتەتىنىڭ بۇرىنعى ءبولىم باستىقتارى جانە بىرەۋى جەكە كومپانيا قىزمەتكەرى. اتالعان ازاماتتارعا ۇيىمداسقان قىلمىستىق توپ قۇرىپ، كونتراباندالىق جولمەن جالپى قۇنى 2 ميلليارد 600 ميلليون تەڭگە بولاتىن تاۋارلاردى قىتايدان رەسەيگە قازاقستان ارقىلى تاسىمالداۋدى ۇيىمداستىرعان دەگەن ايىپ تاعىلىپ وتىر»، - دەپ اتاپ ءوتتى ن. وراز. كۇدىكتىلەر وزدەرىنىڭ قىلمىستىق ارەكەتتەرىن 2014 -جىلعى ماۋسىمنان باستاپ جەلتوقسانعا دەيىنگى كەزەڭ ارالىعىندا ىسكە اسىرىپ كەلگەن. «قازىرگى كۇنى كۇدىكتىلەر استانا قالالىق ىشكى ىستەر دەپارتامەنتىنىڭ ۋاقىتشا ۇستاۋ يزولياتورىنا قامالدى. ۇيىمداسقان توپ مۇشەلەرىنە قاتىستى دالەلدەمەلەر جينالدى. تەرگەۋ مۇددەسى ماقساتىندا ىسكە قاتىستى باسقا ءجايتتار جاريالانبايدى. تەرگەۋ جالعاسۋدا»، - دەپ ءتۇيدى ول.
