ناعىز ايەل قانداي بولۋى كەرەك؟

استانا. قازاقپارات - قاي ايەل بولماسىن جۇبايىنىڭ سۇيىكتىسى، قالاۋلىسى بولعىسى كەلەدى. بىرىگىپ قۇرعان وتباسىنىڭ شىرقىن بۇزباي، مەيىرىمدى، تارتىمدى بولۋعا تىرىسادى.

بۇل تۋرالى كوپتەگەن باسىلىم بەتتەرىنەن كەزدەستىرە الاسىزدار. باسىلىمداردىڭ دەنى جۇبىنا جاقسى قاراپ، ونىڭ جۇمىستاعى ماسەلەلەرىمەن ءبولىسىپ، ۇيدە جايلى اتموسفەرا تۋعىزۋعا كەڭەس بەرەدى. الايدا بۇل ارەكەتتەر ناعىز ايەل بولۋدىڭ ناق قادامدارى ما؟

تاجىريبە جۇرگىزەتىن پسيحولوگتار، ەگەر سۇيىكتىڭىزگە تارتىمدى، قىزىقتى بولىپ كورىنگىڭىز كەلسە، الدىمەن وزىڭىزگە ءوزىڭىز تاڭدانىڭىز دەپ كەڭەس بەرەدى. ايەل الدىمەن وزىنە قىزىعۋ، تامسانۋ، سەنۋ ارقىلى جان-جاعىنداعىلار جۇمباق كورىنگەن ارۋدى شەشكىسى كەلىپ، قىزىعۋشىلىقتارى ارتا باستايدى. ەگەر قىز-كەلىنشەكتەر ءوزىن باعالاي الماي، باسقالاردان تومەن ساناسا، وعان ەشقاشان كۇيەۋىنىڭ تاراپىنان ماقتاۋلار مەن قوشەمەتتەر بولمايدى. ايەل زاتىنا ەڭ الدىمەن نازىكتىك كەرەك. ءوزىن ءوزى ۇستاۋىمەن ەركەشەلەنىپ، سابىرلى، سالماقتى سويلەۋ قاجەت. كەيىن ءوزىن ساقتاپ، سىرت كەلبەتىن كۇتۋ كەرەك.

قوعامدا تاڭداعانىنا قوسىلىپ، تۇرمىسقا شىققان كەلىنشەكتەردەن ءبىر كەمشىلىك اڭعارامىز. ادەتتە ولار تۇرمىسقا شىققانعا دەيىن تارتىمدى، سىمباتتى ءجۇرىپ، كۇتىنسە، وتباسىن قۇرعاننان كەيىن، تۇرمىستىڭ كۇيبەڭ تىرشىلىگىنە بوي بەرىپ، وزدەرىن مۇلدەم ۇمىتىپ كەتەتىندەر از ەمەس. بالاعا قاراپ، كۇيەۋىنىڭ جاعدايىن جاساپ، جان-جاققا ۇلگەرە الماي دەل-سال بوپ جۇرگەندە، كۇيەۋىنىڭ باسقالارعا كوز سالىپ جۇرگەنىن دە بايقاماي قالادى. ونداي جاعدايدا كىنا تەك ءبىر ادامنان ەمەس، قاتەلىكتەر ەكى ادامدا دا بولادى.

سوندىقتان دا ايەل ادام ۇيدە ءجۇرىپ تە، ءوزىنىڭ سىرتقى كەلبەتىن، سىمباتىن كۇتۋگە، گاردەروبىن جاڭارتىپ وتىرۋعا ۋاقىت تابا ءبىلۋى كەرەك. ەگەر ول ءوزىنىڭ سىرتقى كەلبەتىنە كوڭىلى تولسا، ءوزىنىڭ سۇلۋ ەكەنىنە سەنىمدى بولسا، وعان جارىمەن جىنىستىق قارىم-قاتناسقا ءتۇسۋ دە اسا قيىنعا سوقپايدى.

كۇيەۋى كوزىنە ءشوپ سالعان ءاربىر ايەل بەلگىلى ءبىر دارەجەدە وزىنە دەگەن سەنىمىن جوعالتادى.

ءسىزدىڭ ويىڭىزشا، مىنا ەكى تيپتەگى ايەلدىڭ قايسىسى دۇرىس شەشىم قابىلدايدى؟ ءدامى ءتىل ۇيىرەر ءدامدى تاماق جاساپ، ءوزىن رەتكە كەلتىرۋگە ۇلگەرمەگەن ايەل مە، جوق الدە، تاماق جاساۋعا ۋاقىت بولمەي، كۇيەۋىن كوزدىڭ جاۋىن الاتىن، جانىن ەلىكتىرەر ىشكيىمدەرمەن قارسى العان ايەل مە؟ جانىن راحاتقا بولەر توسەكتەگى جاتتىعۋلاردان سوڭ دا تاماقتانۋعا مەيرامحاناعا بارۋعا بولادى ەمەس پە، ارينە كۇيەۋىڭىز قيىلىپ شاقىرىپ تۇرسا.

ءاربىر ايەل ونىڭ ماحابباتى پاتولوگيالىق تاۋەلدىلىككە تۇسپەس ءۇشىن، وزىنە قاراۋدى، ءوزىن كۇتۋدى ۇمىتپاعانى ابزال. سىمباتىڭىزدى ادەمى قالىپتا ساقتاۋدى استە ەستەن شىعارماڭىز. رۋحاني جاعىنان دا توقىراپ قالماي، بايىتا ءتۇسىپ، وپتيميستىك كوزعاراستى ۇستانىڭىز. سوندا جۇبايىڭىزدىڭ نازارى تەك سىزگە اۋىپ، ءسىزدىڭ ايەلگە ءتان ەركەلىگىڭىزدىڭ بارلىعىن سۇيسىنە كوتەرەدى.

massaget.kz